Быйыл Дьокуускайга 50 саҥа оптуобуһу атыылаһар былааннаахтар

Өрөспүүбүлүкэ бүддьүөтүн суотугар 50 саҥа оптуобуһу киин куоракка анаан атыылаһар былааннаахтар. Билигин Дьокуускайга 210 оптуобус уларыйыыга наадыйар. Бу туһунан Ил Дархан Айсен Николаев быһа эпииргэ эттэ.

“Быйыл төһө да үбүлээһин өттүнэн уустук буоллар, субсидиялааһын бырагырааматынан 50 оптуобуһу атыылаһыахпытын сөп. Күн ахсын Дьокуускайга 290 оптуобус үлэлии тахсар, олортон 210-на 2013-2018 сс. ылыллыбыт ПАЗиктар. Балар аныгы, быдан комфортабельнай уонна элбэх киһини киллэрэр оптуобустарга уларыйыахтаахтар. 2030 сылга диэри өрөспүүбүлүкэ 500-чэкэ оптуобуһу атыылаһар былааннаах, онтон аҥара Дьокуускайга, аҥара атын муниципалитеттарга ыытыллыа”, — диэтэ Ил Дархан.