Быйыл Краснодарскай кыраай лааҕырдарыгар Саха сириттэн 660 оҕо сынньаныаҕа

Күн бүгүн Краснодарскай кыраайга баар доруобуйаны бөҕөргөтөр лааҕырдарга 337 оҕо сынньанна, кинилэртэн “Дон” лааҕырга – 182, “Морское братство”  — 105, “Юбилейнайга” – 50. Быйыл өрөспүүбүлүкэттэн 660 оҕо бу лааҕырдарга сынньаныаҕа, ол иһигэр 292 оҕо  Арктика 13 улууһуттан.

Бу күннэргэ өрөспүүбүлүкэтээҕи “Бэс чагда” киин дириэктэрэ Яна Иванова тустаах лааҕырдар үлэлэрин билистэ.

Исписэлиистэр оҕолор утуйар куорпустарын, остолобуойу, мэдиссиинэ хосторун, сөтүөлүүр сири көрдөрдүлэр. Аһылыктара, усулуобуйалара, терроризмтан куттал суох буолуутун хааччыйыылара бары ирдэбилгэ сөп түбэһэр.

“Юбилейнай” лааҕырга Саха сирин оҕолоро тиийиилэригэр суунар, тахсан киирэр сирдэри саҥардыбыттар. Оҕолор саҥа өрөмүөннэммит толору хааччыллыылаах куорпустарга үстүү-түөртүү буолан олороллор.

“Дон” оҕо сынньалаҥын уонна доруобуйатын бөҕөргөтөр сайыҥҥы комплекска оҕолору кытта Ростовтааҕы судаарыстыбаннай педагогическай университет “СодружествоВО” этэрээтэ үлэлиир. Этэрээт 16 сылтан ордук кэм устата Бүтүн Арассыыйатааҕы уонна эрэгийиэннэр икки ардыларынааҕы таһымнаах лааҕыр профильнай симиэнэлэрин арыаллыыр. Педагогтар ааптарыскай бырагырааманан анал бэлэмнэниини ааһаллар. Оҕолор остолобуойга “шведскэй остуол” көрүҥүнэн аһыыллар.

“Морское братство” лааҕыр бастакы симиэнэтигэр Кировскай куораттан 105 оҕо сынньанна. Санатан эттэххэ, өрөспүүбүлүкэ Саха сиригэр сыһыарыллыбыт Донецкай Норуодунай Өрөспүүбүлүкэ Кировскай куоратыттан 500 оҕо сынньалаҥын тэрийиэхтээх.

Өрөспүүбүлүкэ оҕолоро сыллата сынньалаҥнарын Краснодарскай, Приморскай кыраайдар лааҕырдарыгар атаараллар, сылы эргиччи Бүтүн Арассыыйатааҕы “Океан”, “Смена”, “Орленок” оҕо кииннэригэр уонна “Артек” норуоттар икки ардыларынааҕы кииҥҥэ сынньаналлар.

Ил Дархан уонна Бырабыыталыстыба пресс-сулууспата.