Быраастар кыыс куртаҕыттан чөмөх баттаҕы ылбыттар

Дьокуускайга быраастар 18 саастаах  кыыс куртаҕыттан чөмөх баттаҕы ороон ылбыттар. Кыыс аһыах баҕата сүтэн, куртаҕа ыалдьан, сүрэҕэ көбөн быраастары ыҥырбыт. Бу туһунан ЯСИА суруйар.

Онуоха өрөспүүбүлүкэтээҕи 1-кы уонна 2-с №-дээх балыыһа хирург быраастара Василий Игнатьев уонна Прокопий Семенов суһал эпэрээссийэни оҥорбуттар.

«30 см уһуннаах баттах кыыс куртаҕын барытын толорбут. Онтон сылтаан кыыс сатаан аһаабат буолбут. Ол түмүгэр кыыс улаханнык ырбыт. Кини тута суһал мэдиссиинэ көмөтүгэр наадыйан ити баттаҕы куртаҕыттан ыллыбыт. Кыыс ыйыстыбыт баттахтара «трихобезоар» диэн  ааттанар. Кыыс икки ый анараа өттүгэр эндоскопическай чинчийиини ааспыта, онно куртаҕар баттах баара биллибэтэҕэ. Онон кылгас кэм иһигэр кыыс куртаҕар ити баттах киирбит. Эпэрээссийэ этэҥҥэ ааста. 21 сыл үлэлээбитим устатыгар бастакыбын манныкка түбэһэбин. Куртаҕын бэрэбиэркэлиирбитигэр ити баттах таас курдук куртах нөҥүө биллэр этэ. «, — диэн ЯСИА-ҕа Василий Игнатьев кэпсээбит.

Билигин эмсэҕэлээбит кыыс этэҥҥэ. Этэҥҥэ аһыыр буолбут, быраастар иһитиннэрбиттэринэн, маннык түгэннэр аҕыйахта бэлиэтэнэллэр эбит.