Бырабыыталыстыба отчуота Бүлүү улууһугар түмүктэннэ

Бүгүн, олунньу 9 күнүгэр, Саха Өрөспүүбүлүкэтин Бырабыыталыстыбатын ааспыт 2023 сыллааҕы үлэтин отчуотун М.Н.Жирков аатынан култуура дыбарыаһыгар мустубут дьоҥҥо иһитиннэрдэ.  

Улууска отчуоттуур бөлөҕү салайбыт СӨ Тыа хаһаайыстыбатын миниистирэ А.А.Александров өрөспүүбүлүкэҕэ ааспыт сылга ыытыллыбыт үлэни-хамнаһы уонна бу күннэргэ нэһилиэктэргэ сырыынан түмүгү иһитиннэрдэ.

-Үс күн 21 нэһилиэги түөрт бөлөҕүнэн хайдыһан хабан үлэлээтибит. Кыһалҕалаах бопуруостар миэстэлэригэр быһаарылыннылар. Былырыын уопсайа 87 боппуруос турбут буоллаҕына, мантан 22-тэ туолан турар, — диэтэ кини. Ааспыт сылга бары хайысханан ыытыллыбыт үлэни-хамнаһы, ситиһиини билиһиннэрдэ.

Оттон бүгүн түмүктүүр мунньахха дьон-сэргэ долгуйар ыйытыыларын биэрдилэр, санааларын үллэһинилэр, туруорустулар.

Бастакынан бөһүөлэккэ сибээс боппуруоһа кыаллан быһаарыллыбакка турара, ону сэргэ, интэриниэккэ тарыып ыарахана долгутара этилиннэ. Бүлүүгэ 990 миэстэлээх оскуоланы туруорустулар.  Уот-күөс боппуруоһун быһаарарга, толкуйдуурга, тугу тутар ордугун чопчулуурга көрдөстүлэр. Судаарыстыбаннай диэйэтэл, Саха сирэ киэн туттар чулуу киһитэ Г.И.Чиряев төрөөбүтэ 100 үбүлүөйдээх сылын көрсө бэлэмнээбит кинигэлэрэ үп-харчы көстүбэккэ тахсыбакка сытара этилиннэ. Манна сыһыары тутан, Кыадаҥдаттан кэлбит түмэл дириэктэрэ М.С.Томскай, бу үбүлүөйдээх тэрээһини көрсө 2023 сыллаахха тэриллибит хамыыһыйа дьонун үрдүкү салалтаҕа уларыйыылар буолбуттарынан эмиэ уларытан биэрэргэ уонна таас түмэли тутары туруоруста. Түмэлгэ өрөспүүбүлүкэ статуһа бэриллэрэ буоллар диэн баҕа санаатын өссө төгүл тоһоҕолоон эттэ.

Үлэ, тыыл бэтэрээнигэр түөскэ кэтэр бэлиэ олохтуохха баара диэн былырыын отчуокка кэлбит бөлөххө этэн турарын ытык кырдьаҕас Г.Солтуев санатта уонна туруоруста. Кини салгыы сэрии сылын оҕолоругар тохтоото. Кыайыы 80  сыла буолаары турарынан, 2025  сылы сэрии сылларын оҕолоругар аныырга туруоруста, көрдөстө.

Бырабыыталыстыба отчуотун киэбин уларытан биэриэххэ диэн этии эмиэ киирдэ. Онно былырыын кэлэн истибит, ыйыталаспыт, тылын биэрбит киһи быйыл эмиэ кэлэн бу биэрбит тылыттан төһө толоруллубутун, туох үлэ ыытыллыбытын, туох кыаллыбытын, кыаллыбатаҕын иһитиннэриэхтээх диэн этилиннэ. Салгыы Бүлүүгэ улахан успуорт комплексын туруорустулар.

Түмүктүүр мунньахха киирбит боппуруостарга сиһилии быһаарыылар, сүбэлэр-амалар тута бэрилиннилэр. Сорох ыйытыылар тустаах министиэристибэлэргэ, биэдэмистибэлэргэ тиэрдиллиэхтэрэ диэн этилиннэ.

Болҕомтону ирдиир элбэх ыйытыылар, туруорсуулар киирдилэр. Отчуот хаамыытыттан уонна отчуокка салайааччылар дьон-сэргэ ыйытыыларыгар толору хоруйдары биэрбиттэриттэн астыналларын биллэрдилэр. Норуот иннигэр ыытыллыбыт үлэ-хамнас туһунан отчуоту чуолкай, чопчу диэн астына истибиттэрин бэлиэтээтилэр. Бүлүү улууһугар ыытыллыбыт Бырабыыталыстыба отчуотун биһирииллэрин биллэрдилэр.