Бырабыыталыстыба түмүктүүр отчуота. Нерюнгри куоратын тиэргэннэрин уонна оҕо былаһааккаларын тупсарыахтара дуо?

Бүгүн, кулун тутар 7 күнүгэр, Дьокуускай куоракка СӨ Бырабыыталыстыбатын түмүктүүр отчуота саҕаланна.

Бастакы ыйытыы Нерюнгри оройуонуттан киирдэ. Ол курдук, Олоҥхо ыһыаҕын көрсө Нерюнгри куорат тиэргэннэригэр уонна оҕо оонньуур былаһааккаларыгар тупсарыы үлэтэ ыытыллыа дуо? диэн ыйыттылар.

Ыйытыыга СӨ Бырабыыталыстыбатын бэрэссэдээтэлэ Кирилл Бычков хоруйдаата:

— Нерюнгри оройуонун нэһилиэнньэтэ сыл ахсын элбээн, кэҥээн иһэр. Маны сэргэ, бу кэлэр сайын Нерюнгрига өрөспүүбүлүкэ таһымнаах Олоҥхо ыһыаҕа «Амикан» пааркаҕа ыытыллыахтаах. Онон сибээстээн, элбэх кыбартыыралаах дьиэлэр тиэргэннэрин, дьон сылдьар, хаамар тротуардарын, ону сэргэ оҕо оонньуур былаһааккаларын тупсарыыга үлэ барыаҕа.