Бүрээт тылын учуутала санаатын үллэстэр

Сийиэс ыҥырыылаах ыалдьыта, Бүтүн Арассыыйатааҕы “Төрөөбүт тыл, литэрэтиирэ бастыҥ учуутала-2024” күөн күрэс кыайыылааҕа, Улан-Удэ куорат (Бурятия) 1-кы нүөмэрдээх өрөспүүбүлүкэтээҕи национальнай лиссиэй-интэринээтин  алын кылааһын, бүрээт тылын учуутала Светлана Раданжапова санаатын үллэстэр:

— Миигин барыбыт кыһалҕабыт – төрөөбүт тылы үөрэтии боппуруоһа долгутар. Биһиги оҕону төрөөбүт тылынан саҥарда үөрэтэрбит таһынан, ийэ тылбытын, өбүгэлэрбититтэн илдьэ кэлбит култуурабытын кэлэр көлүөнэҕэ — үөрэнээччилэрбитигэр тириэрдэр улахан аналлаахпыт. Онон саха тылын, литэрэтиирэтин, култууратын учууталларын III сийиэһэ аныгы, инновационнай технологиялары, үлэ уопутун, быраактыканы, өйүгү үллэстэр былаһаакканан буоларыгар эрэнэбин. Хас биирдии киһи тэрээһинтэн туһалааҕы иҥэринэн барыа дии саныыбын.

Бу сийиэскэ мин учууталларга аудирование туһунан бэйэм уопуппуттан үллэһинним. Бу технологиянан үлэлээбитим номнуо хаһыс даҕаны сылыгар барда, куурус оҥорбутум.

Аудированиенан төрөөбүт тыл биридимиэтин учууталлара букатын аҕыйахтык үлэлииллэр. Аудирование — тыл үлэтин түөрт көрүҥнэриттэн биирдэстэрэ: аудирование, саҥа, ааҕыы, сурук. Бу, аудионан матырыйаалы аҥаардас истии эрэ буолбатах, ону таһынан, ылыныы, өйдөөһүн, толкуйдаан таһаарыы. Оҕо маҥнай төрөөт да истэр, онтон хатылыыр, ол эрэ кэнниттэн саҥарар, ааҕар, суруйар буолар. Бу төһө суолталааҕын, хайдах туһаныахха сөбүн туһунан бэйэм уопуппуттан үллэһинним.

Биһиги оскуолабыт өрөспүүбүлүкэтээҕи 1-кы нүөмэрдээх национальнай лиссиэй-интэринээт диэн ааттаах. Улан-Удэ куоракка бүрээт тылын төрөөбүт тыл быһыытынан үөрэтэр соҕотох кыһа. Бүрээт тылын үөрэтиигэ 3 чаас, литэрэтиирэтин үөрэтиигэ 2 чаас көрүллэр. Уопсайынан, Бурятияҕа бүрээт тылын  бары үөрэтэллэр. Ол гынан баран, Улан-Удэҕэ судаарыстыбаннай тыл быһыытынан үһүс бырагырааманан нэдиэлэҕэ икки чаас көрүллэр.

Дьокуускайга бэҕэһээ сарсыарда 5 ч. эрэ көтөн кэллим. Билиҥҥитэ ханна да сылдьа иликпин, сөрүүн салгынын эрэ биллим. Саха сиригэр аан бастакытын үктэнним, баҕа санаам дьэ туолла.