Быыбардыыр учаастак таһыгар аҕытаассыйа көҥүллэммэт!

Быыбардыыр сорох  учаастактартан бу күннэргэ сокуонунан аҕытаассыйа көҥүллэммэтин үрдүнэн бу бобууну кэһиилэр тахсыбыттарын туһунан иһитиннэриилэр киирдилэр.

Уопсастыбаннай кэтэбил ыстаабын салайааччыта Станислав Иванов этэринэн, куоластыыр учаастак аттыгар көстүбүт аҕытаассыйа түгэннэрэ тута туоратыллыбыттар, куоластааһын сөптөөхтүк бара турар.
Холобур, Покровскай 645 N-дээх учаастагар “Сиэрдээх Арассыыйа” саһархай өҥнөөх сэлиэччигин кэппит кэтээн көрөөччү кэлбит. “Новые люди” партия дьоно бу туһунан телеграм-ханаалга айдаан таһаарбыттар. Ол эрэн атын кэтээн көрөөччүлэр хамыыһыйаҕа тыллаабыттар уонна бэйэтиттэн сэлиэччиги устарыгар көрдөспүттэр. Онон, бу түгэн миэстэтигэр быһаарыллыбыт.
Дьокуускай 806 N-дээх учаастагын таһыгар “Биир ньыгыл Арассыыйа” баннера ыйаммыт массыына турара бэлиэтэммит. Куоластыыр учаастактан 50 миэтэрэ чугас аҕытаассыйа ыытыллыа суохтаах, онон массыынаны атын сиргэ сыҕарыйарыгар ыйбыттар.
НОМ федеральнай координатора Алексей Песков этэринэн, “Элбэх күннээх быыбар маҥнайгы күнүгэр бу курдук кэһиилэр чаастатык буолааччылар. Бу сокуон модьуйуутун кэһии буоларын өйдөттөххө, баартыйалар чилиэттэрэ тутатына аҕытаассыйалыыр матырыйаалларын сөбө суох сиртэн тэйитэллэр.