Быыстапка: Арктиканы дьүһүйүү эриэккэс түһүмэхтэрэ…

Сарсын, алтынньы 31 күнүгэр СӨ Национальнай художественнай мусуойугар “Образ Арктики” диэн Арассыыйа үтүөлээх, Саха Өрөспүүбүлүкэтин норуодунай худуоһунньуга, СӨ искусствотын үтүөлээх диэйэтэлэ, педагогическай наука кандидата, муосчут, ювелир Георгий Николаевич Родионов персональнай быыстапката үлэтин саҕалыыр.

Георгий Родионов сүрүннээн сэлии муоһуттан, үрүҥ көмүстэн, металлтан, мастан уопсайа  1200-н тахса үлэни айан кэллэ.  Кини бастыҥ айымньыларын искусствоны сэҥээрээччилэр Арассыыйа, СНГ уонна тас дойдулар үгүс мусуойдарыгар кэрэхсии көрөллөр.  Арассыыйа Худуоһунньуктарын сойууһун чилиэнэ, Наука уонна искусство Петровскайдааҕы академиятын дьиҥнээх чилиэнэ Георгий Родионов 1986 сылтан өрөспүүбүлүкэ, Дальнай Восток, Арассыыйа уонна араас омук дойдуларын  уус-уран быыстапкаларыгар ситиһиилээхтик кыттар.

Георгий Родионовы кэллиэгэлэрэ декоративнай-прикладной искусствоҕа үрдүк квалификациялаах исписэлииһинэн билинэллэр, сыаналыыллар. Кини М.К.Аммосов аатынан  Хотугулуу-Илиҥҥи федеральнай университекка өр сыл үлэлээн кэлбит  уопуттаах преподаватель буолар. Георгий Николаевич бэлэмнээбит үгүс үөрэнээччилэрэ-муосчуттар искусство үтүөлээх диэйэтэллэрэ, Бүтүн Арассыыйатааҕы куонкурустар лауреаттара  буола үүннүлэр, ыччаттар онтон да атын ситиһиилэрэ үгүс.

Худуоһунньук Георгий Родионовка анималистическай, фольклор тиэмэлэрэ уонна төрөөбүт сахатын норуотун түҥ былыргы устуоруйатыттан сюжеттара ордук чугастар. Оҥоһуктарын көрүҥэ араас: объемнай пластика, рельефтэр, чорооннор, кубоктар,  саахымат, саха быһаҕа, хамсата… 1993 сыллаахха кини Италияҕа ыытыллыбыт ювелирнай дьыалаҕа норуоттар икки ардыларынааҕы куурустарга күндү металлар холбоһуктарын, дамасскай уонна булатнай ыстаалы оҥорон таһаарыы технологиятын баһылаан кэлбитэ. Онон, кини тимири уонна сэлии муоһун дьүөрэлээн, “батас” — саха былыргы сэриилэһэр тэрилин көрүҥнэрин аныгылыы тыыннаан  оҥорууну сөргүтэр. Георгий Николаевич эскизтэринэн Урал маастардара дамасскай ыстаалтан “Якутская пальма – Кыайыы батаһа” оҥорбуттара. Бу үлэ Кыайыы 50 сылыгар аналлаах Арассыыйа куонкуруһугар кыттан, бириэмийэнэн наҕараадаламмыта.

Худуоһунньук Георгий Родионов Улуу Кыайыыны кытта саастыы – кини 1945 сыллаахха сэтинньи 12 күнүгэр Чурапчы улууһун Хоптоҕо нэһилиэгэр (Дириҥ) күн сирин көрбүтэ. Ийэтэ Варвара Осиповна Пестерева – сэбиэскэй, партийнай үлэһит, салайааччы, сэрии сылларыгар Чурапчы холкуостара хоту күүс өттүнэн көһөрүүгэ ыытыллыбыттарын кэннэ II Мэлдьэхси нэһилиэгин соҕотох хаалбыт “Тахсыбыт Сардаҥа” холкуоһугар бэрэссэдээтэллээн, дьонун-сэргэтин көрөн-истэн, холкуоһун 1947 сыллаахха өрөспүүбүлүкэ биир бастыҥ үлэлээх хаһаайыстыбата буоларын ситиспитэ, ити сыл кини Саха АССР II Ыҥырыылаах Үрдүкү Сэбиэтин дьокутаатынан быыбардаммыта. Георгий аҕата Николай Григорьевич Родионов – Аҕа дойду Улуу сэриитин бэтэрээнэ, буойун-учуутал, оскуола дириэктэринэн үгүс сыл айымньылаахтык үлэлээбитэ.  Төрөппүттэрин үлэлэринэн хоту Эдьигээҥҥэ олорон, үөрэнэн, Кыстатыам оскуолатын бүтэрэн, Георгий Дьокуускайга үөрэнэ кэлбитэ. 1968 сыллаахха Георгий Родионов Дьокуускайдааҕы художественнай училищены, 1993 сыллаахха Саха госуниверситетын педагогическай факультетын  ситиһиилээхтик үөрэнэн бүтэрбитэ. Бастакы уонча сылларга оскуолаҕа учууталлаабыта, үөрэммит кыһатыгар Художественнай училищеҕа преподавателлээбитэ, Дьокуускайдааҕы ювелирнай заводка, Норуоттар икки ардыларынааҕы Мамонт мусуойугар кылаабынай худуоһунньугунан таһаарыылаахтык үлэлээбитэ.  Науканан дьарыктанар. 1996 сылтан Саха государственнай университетын саха филологиятын уонна национальнай культуратын факультетын доцена, 2007 сылтан инженернэй-техническэй институт (ЯГИТИ)  кафедратын сэбиэдиссэйэ. 2013 сылтан М.К.Аммосов аатынан ХИФУ инженернэй-техническэй институтун “Архитектура уонна куорат тутуута” кафедратын доцена. Кини 40-н тахса сыл педыстаастаах. Георгий Родионов – тапталлаах аҕа, эйэҕэс эһээ, хос эһээ, чөл олох сылайары билбэт пропагандиһа, СӨ уонна РФ спордун маастара. Кини чэпчэки атлетикаҕа марафоҥҥа уонна стайерскай дистанцияларга өрөспүүбүлүкэ, дойду элбэх төгүллээх чөмпүйүөнэ, призера.  Үгүс сыллар тухары “Дьулуур” сүүрүүнү таптааччылар өрөспүүбүлүкэтээҕи кулууптарын бэрэссэдээтэлин спортивнай үлэҕэ солбуйааччынан ситиһиилээхтик үлэлээбитэ.

Айдарыылаах худуоһунньук, муосчут Георгий Родионов 80 сааһыгар аналлаах персональнай быыстапкатын  куратордарынан искусствовед, НХМ кылаабынай научнай үлэһитэ Ася Львовна Габышева уонна худуоһунньук кыыһа, суруналыыс Варвара Георгиевна Куличкина буолаллар.

Бэйэтэ ураты буочардаах, суоллаах-иистээх худуоһунньук, талааннаах муосчут, педагог, дэгиттэр маастар  үбүлүөйдээх айар быыстапкатын   НХМ (Киров уул.,9) быыстапкалыыр саалатыгар (3-с этээс) алтынньы 31-2026 сыл тохсунньу 11 күннэригэр кэлэн  көрөргүтүгэр ыҥырабыт.