Чааһынай уһуйааннар уонна мэдиссиинэ тэрилтэлэрин үлэһиттэригэр чэпчэтии судаарыстыба тэрилтэлэрин үлэһиттэригэр курдук буолуохтаах

Бу курдук этиилээх атыы-бырамыысыланнай палаататын иһинэн үлэлиир “Сайдыы” өрөспүүбүлүкэ чааһынай уһуйааннарын ассоциациятын бэрэссэдээтэлэ Анна Постникова Владимир Путин уопсастыбаннай приемнайыгар киирбит.

Кини мэдиссиинэ уонна оскуола иннинээҕи үөрэхтээһин судаарыстыбаннай тэрилтэлэрин үлэһиттэригэр аналлаах бары социальнай мэктиэлэри чааһынай уһуйааннарга уонна килииникэлэргэ үлэлиир быраастарга уонна иитээччилэргэ тарҕатары этэр. Доруобуйа харыстабылын уонна үөрэх эйгэтин  судаарыстыбаннайа суох тэрилтэлэриттэн ирдэбил син биир бүддьүөт тэрилтэлэригэр үлэлиир кэллиэгэлэригэр курдук. Хайа хайалара даҕаны лиссиэнсийэлээх буоллахтарына үлэлиир кыахтаахтар, оннооҕор дохуоттарын таһыма үксүгэр тэҥ, ол аата кинилэр эмиэ бүддьүөккэ нолуоктара биир.

Анна Постинкова бэйэтин этиитигэр “Уһук Илин ипэтиэкэни” чааһынай үөрэх тэрилтэтин педагогтара эмиэ туһаналларын туруорсар. Судаарыстыбаннайа суох балыыһылар миэдиктэрин дьиэ кирэдьиитин чэпчэтиилээх бырагырааматыгар киллэрии идиэйэтэ федеральнай таһымҥа сөбүлэһиини ааспыт. Билигин ону сокуонунан бигэртэтии оҥоһуллар.

Постникова өссө биир этиилээх – ыарыһахха эппиэтинэстэрин таһыма уонна идэҕэ ирдэбиллэрэ  судаарыстыбаннай балыыһаҕа уонна поликлиникаҕа үлэлиир биир идэлээхтэриттэн намыһаҕа суоҕунан, чааһынай мэдиссиинэ кииннэригэр үлэлиир быраастарга болдьоҕун иннинэ биэнсийэни анааһын. Манна даҕатан эттэххэ, билигин педагогтар эрдэ биэнсийэҕэ тахсар бырааптарын, ол иһигэр бүддьүөт уонна чааһынай тэрилтэлэр үлэһиттэрэ бары, бигэргэтэ сылдьаллар.

Владимир Путин уопсастыбаннай приемнайа ааспыт сыл ахсынньытыттан үлэлиир. Өрөспүүбүлүкэбит олохтоохторуттан киирбит көҕүлээһиннэри, этиилэри барытын  хандьыдаакка тириэрдэллэр.

Санатан эттэххэ, Арассыый Бэрэсидьиэнин быыбара 2024 сыл кулун тутар 15-17 күннэригэр ыытыллар. Быыбар киин кэмитиэтэ быыбарга түөрт хандьыдааты аһарбыта. Бу бэйэтэ туруоруммут дойду билиҥҥи баһылыга Владимир Путин. Ону тэҥэ, Арассыыйатааҕы баартыйалартан турар Николай Харитонов (КПРФ), Леонид Слуцкий (ЛДПР) уонна Владислав Даванков («Саҥа дьон»).