Чокуур Гаврильев — СӨ үтүөлээх суруналыыһа

Бүгүн, тохсунньу 13 күнүгэр, Арассыыйа бэчээтин күнэ. Бу күн «Сахамедиа» тэрилтэ генеральнай дириэктэрин солбуйааччы Чокуур Николаевич Гаврильев СӨ Үтүөлээх суруналыыһын үрдүк аатын ылла.

Чокуур Гаврильев 2000 сыллаахха үлэтин  «Саха» НКИХ бэрэсидьиэнин көмөлөһөөччүтүнэн саҕалаабыта.

2003-2005 cc — «Саха» НКИХ каадырын уонна тэрийэр салаатын сүрүн исписэлииһэ.

2005-2007 cc — «Саха» НКИХ каадырын уонна тэрийэр салаатын начаалынньыга.

2007 -2012 cc — «Саха» НКИХ тэлэбиидэньэтин дириэксийэтин салайааччыта.

2012 -2017 cc «Саха сирэ» өрөспүүбүлүкэтээҕи хаһыат сүрүн эрэдээктэрэ.

2017-2020 — CӨ сибээһин уонна информационнай технологиятын миниистирин солбуйааччы.

2020-2022 — Ил Түмэн Сүбэ мунньаҕын пресс-сулууспатын салайааччыта.

2022 c. «Саха сирэ» хаһыат сүрүн эрэдээктэрэ, салгыы «Сахамедиа» тэрилтэ генеральнай дириэктэрин солбуйааччынан күн бүгүнүгэр диэри үлэлиир.

Чокуур Гаврильев санаатын маннык үллэһиннэ:

— 2018 сыллаахха Саха Өрөспүүбүлүкэтин үтүөлээх суруналыыһа ааты Ил Түмэҥҥэ сокуон бырайыагын быһыытынан киллэрэрбитигэр, аны аҕыс сылынан бу наҕараадаҕа бэйэм тиксиэм дии санаабатаҕым. Бу мин эрэ өҥөм буолбатах, бастатан туран суруналыыстыка эйгэтигэр мин бииргэ үлэлээбит, үлэлиир кэллиэгэлэрим үтүөлэрэ буолар. Бу санаатахха, суруналыыстыка эйгэтигэр номнуо 25 сыл үлэлээбит эбиппин. Ол курдук бу эйгэҕэ үлэлээбит сирдэрбинэн «Саха» НКИХ, «Сахамедиа», ону сэргэ олус чугастык саныыр «Саха сирэ» хаһыатым, Ил Түмэн пресс-сулууспата, уруккунан сибээс, билиҥҥинэн инновация министиэристибэтэ буолаллар.  Биһиги ыыппыт чинчийиилэрбит көрдөрөллөрүнэн, медиа эйгэтэ, ону туһаныы, туттуу түргэнник уларыйар. Эдэр көлүөнэ, биһиги оҕолорбут, информацияны аныгылыы, социальнай ситим нөҥүө ылалларын ордорор буоллулар. Онон үгэс быһыытынан үлэлиир суруналыыстыка эйгэтэ саҥа медиа хайысхатыгар болҕомто ууруон наада, үүнэр көлүөнэҕэ, ыччакка медиа интэриэһинэй бородууксуйатын тэрийиэхтээх. Бу ордук төрөөбүт тылы харыстааһын боппуруостарыгар сыһыаннаах. Мин саныахпар, суруналыыстыка уонна биһиги СМИ эйгэлэрэ судаарыстыба өйөбүлүнэн үгэс буолбут сыаннастары үйэтитиигэ туруулаһар кыахтаах, тыл бэлиитикэтин көдьүүстээх инструмена буолуон сөп дии саныыбын.