Чокуурдаахха сыл бүтүөр диэри канализация уутун ыраастыыр ыстаансыйаны үлэҕэ киллэриэхтэрэ

Аллайыаха оройуонун Чокуурдаах бөһүөлэгэр бу сыл бүтүөр диэри кирдээх ууну ыраастыыр ыстаансыйаны үлэҕэ киллэрэри былаанныыллар. Сууккаҕа 400 куб миэтэрэ кыамталаах эбийиэк  СӨ Ил Дархана Айсен Николаев сорудаҕынан тутуллар диэн ОДьКХ министиэристибэтэ иһитиннэрэр.

«Саҥа комплекс кирдээх канализация уутун аныгылыы таһымнаахтык ыраастыыры хааччыйыаҕа, Арктика оройуон киинигэр олох хаачыстыбатын тупсарыаҕа уонна экологическай куттал суох буолуутун күүһүрдүөҕэ», — диэн тэрилтэ генеральнай дириэктэрэ Виталий Чикачев бэлиэтээтэ.

Ыстаансыйаны «Альта Групп» хампаанньа тэрилинэн хааччыйыахтара. Ыраастыыр тутуулары Чокуурдаахха өссө былырыын сыл бүтүүтэ аҕалбыттара, оттон ааспыт нэдиэлэҕэ тутуу былаһааккатыгар таһаардылар.

«Модульнай ыраастыыр тутуулар комплекстарын аннынааҕы билиитэ тутуута түмүктэннэ. Эбийиэги сылааһынан хааччыйар сыалтан чугастааҕы хочуолунайга саҥардыы үлэтэ ыытылынна, наадалаах матырыйааллар кыһыҥҥы суолунан эрдэттэн аҕалылыннылар. Энергетиктар кылгас кэм иһигэр саҥа трансформаторнай подстанцияны аҕалан туруордулар», — диэн Чикачев кэпсээтэ.