Чурапчы оҕолоро олорбут интэринээт дьиэлэригэр өйдөбүнньүк ыйанна

Балаҕан ыйын 19 күнэ — Аҕа дойду Улуу сэриитин сылларыгар хоту оройуоннарга Чурапчы оройуонун холкуостарын күүс өттүнэн көһөрүллүбүт дьоннорун ахтан-санаан ааһар кэриэстиир күммүт.

1942 с. Чурапчы 41 холкуоһун Кэбээйигэ, Эдьигээҥҥэ, Булуҥҥа балыктааһыҥҥа диэн күүс өттүнэн көһөрбүттэрэ.

Бу күн Кэбээйи улууһун Куокуй нэһилиэгэр Павлов Иван Иннокентьевич уһаайбатыгар турар кыра дьиэҕэ өйдөбүнньүк бэлиэ сурук ыйанна. Бу дьиэҕэ сэрии кэмигэр 1942-1944 сс. көһөрүүгэ кэлбит оҕолор олорбуттар. Учууталынан Екатерина Васильевна Куличкина үлэлээбит, бэйэтэ эмиэ көскө кэлбит эдэркээн кыыс эбит. Учуутал идэлээҕин билэн үөрэх салалтата, дьоҥҥун-сэргэҕин, биир дойдулаахтаргын үөрэт диэн сорудахтаабыт. Онон бу кыракый дьиэ — Чурапчы оҕолоро олорон ааспыт интэринээт дьиэлэрэ.

Бу тэрээһини иилээн- саҕалаан Саргылана Николаевна Унарова арыйда.

Чурапчы улууһун историятын  кутурҕаннаах кэрчигин туһунан өйдөбүлү кэлэр көлүөнэ ыччакка табатык тиэрдээри, өлбүттэри кэриэстиир, кинилэри үйэтитэр сыаллаах ыччаттарга, мустубут дьоҥҥо туһаайан бу күн суолтатын туһунан сүгүрүйэн туран, нэһилиэк аҕа баһылыгын солбуйааччыта Илья Васильевич Семенов, Чурапчы оройуонуттан көһөрүллүүгэ кэлбит, олохсуйбут Екатерина Васильевна Куличкина кыыһа Ираида Николаевна Софронеева, оскуола дириэктэрин сүбэһитэ Сардана Иннокентьевна Васильева тыл эттилэр.

Бу тэрээһини тэрийбит оскуолабыт учууталларыгар Саргылана Николаевна Унароваҕа, Антонина Петровна Павловаҕа махтанабыт.

Умнуллубатын, хаһан да хатыламматын!

Полина Жергина.