Цииркэ артыыстара Монголияҕа ситиһиилээхтик кытыннылар

Кулун тутар уонна муус устар ыйдарга Улан-Батор куоракка Монгол цииркэтин сайыннарар киин 10 сыллаах үбүлүөйүн чэрчитинэн, AIC STEPPE ARENA Муус дыбарыаска «Дэлхийн цирк» диэн аан дойдутааҕы бырайыак ыытыллыбыта.

Бу улахан тэрээһиҥҥэ Арассыыйа, Казахстан, Германия, Беларусь, Кытай, Франция, Моноголия, Италия, о.д.а. дойдулар артыыстара кыттыбыттара.

«Дэлхийн цирк» бырайыакка Саха сирин судаарыстыбаннай цииркэтин «Трио жонглеров» артыыстара: Дьулустан Гоголев, Михаил Мохотчунов, Роман Романов кытыннылар. Кинилэр бу иннинэ ALMATY CIRCUS FESTIVAL Норуоттар икки ардыларынааҕы цииркэ ускуустубатын бастакы бэстибээлин кыһыл көмүс бирииһин ылбыттара. Бырайыакка Саха сирин судаарыстыбаннай цииркэтин дириэктэрэ Сергей Расторуев эмиэ ыҥырыллыбыта.

Артыыстар ситиһиилээхтик кыттан, саха цииркэтин ускуустубатын атын омуктарга билиһиннэрэн, өрөспүүбүлүкэбитин өссө төгүл ааттаттылар диэн култуура, духуобунай сайдыы министиэристибэтэ иһитиннэрэр.