Цииркэ жонглердара Казахстааҥҥа көмүс бириискэ тигистилэр

Бу күннэргэ Казахстаҥҥа Алмата цииркэтигэр «ALMATY CIRCUS FЕSTIVAL» диэн Цииркэ ускуустубатын аан дойдутааҕы I бэстибээлэ буола турар. 

15 дойду — Кытай, Болгария, Белоруссия, Вьетнам, Арассыыйа, Казахстан, Узбекистан, Таджикистан, Саха сирэ, Эфиопия уо.д.а. дойдулар ааттаах-суоллаах цииркэлэрин артыыстара  «ALMATY CIRCUS FЕSTIVAL» тэрээһиҥҥэ бэйэлэрин маастарыстыбаларын арыйаллар.

Бу бэстибээлгэ Саха Судаарыстыбаннай бриллиантовай цииркэтин артыыстарын  Михаил Мохотчунов, Дьулустан Гоголев уонна  Роман Романов «TRIO жонглеров» бөлөҕө Көмүс бириискэ тигистилэр!

— Уолаттарбынан киэн туттабыт уонна саха норуотун ускуустубатын инники күөҥҥэ илдьэ сылдьалларыгар махталбытын тиэрдэбит. Кинилэри кытта ситиһии өрүү аргыстаһа турарыгар баҕарабыт, — диэн цииркэ салалтата Казахстантан артыыстарга махталын биллэрэр.