Дьааҥыга эдэр киһи массыына уоран баран, бөһүөлэк иһигэр ыыта сылдьыбыт

Дьааҥы оройуонун полициятын дьуһуурунай чааһыгар олохтоох киһи массыынатын уорбуттарын туһунан иһитиннэрбит. Кини киэһэ элбэх кыбартыыралаах дьиэ таһыгар «Toyota Corona» массыынатын туруорбут, сарсыарда турбута суох буолбут эбит.

Холуобунай ирдэбил үлэһиттэрэ уорбаланааччыны быһаарбыттар. Бу эрдэ сууттана сылдьыбыт 20 саастаах эдэр киһи эбит.

Быһаарыллыбытынан, эдэр киһи түүн доҕотторун кытта көрсөн баран дьиэлээн иһэн, күлүүһэ иһигэр хаалбыт массыына турарын бэлиэтии көрбүт.

Ону туһанан, массыына ойоҕос түннүгүн алдьатан киирбит уонна бөһүөлэк устун айаннаабыт. Сотору кэминэн уорбут массыынатын дьиэтиттэн ырааҕа суох сиргэ хаалларбыт.

Холуобунай дьыала тэрилиннэ.