Дьаарбаҥка байыаннай дьайыыга көмө аахсыйа быһыытынан тэрилиннэ

Кэбээйи улууһун Сииттэ нэһилиэгэр сибиэһэй ас-үөл дьаарбаҥката буолан ааста. Тэрээһиҥҥэ барыта 60-ча киһи кытынна.

“Бу тэрээһиммит анал байыаннай дьайыыга сылдьар биир дойдулаахтарбытыгар  көмө аахсыйа быһыытынан тэрилиннэ, – диэн иһитиннэрдэ А.В. Аргунов аатынан Норуот айымньытын, култууратын  дьиэтин дириэктэрэ Марианна Сивцева. — Дьаарбаҥканы олохтоох дьаһалта баһылыгын солбуйааччы Петр Степанов эҕэрдэ тылынан арыйда. Барыта 20 тыһ. солк. харчы киирэн, тэрийээччилэр астынан олоробут. Нэһилиэкпит кэрэ аҥардара сир аһын, үрүҥ ас, бурдук ас арааһын, оҕуруот аһын хото атыылаатылар. Олохтоох култуура дьиэтин үлэһиттэрэ  «Амтаннаах ас» диэн сибиэһэй аска лотерея  оонньотоммут, дьону-сэргэни олус үөртүбүт. Дьаарбаҥка быыһыгар күһүҥҥү сибэкки дьөрбөтүн оҥоруутугар күрэхтэһии буолан ааста. Кыайыылаахтар олохтоох дьаһалта туруорбут бириистэрин тутан астыннылар, махтаннылар”.