Дьахтар бэлисипиэдинэн оҕону түҥнэри көтөн буруйданна

Киин куорат суутугар оҕону улаханнык эчэтии төрүөтүнэн холуобунай дьыала көрүлүннэ.  Бу туһунан СӨ Борокуратууратын пресс-сулууспата иһитиннэрэр.

Былырыын сууттанааччы дьахтар Дьокуускайга Кыайыы болуоссатыгар бэлисипиэдинэн сылдьан самокаттаах оҕону түҥнэри көппүт. СӨ Борокуратуурата быһылаан сэрэҕэ суохтук туттууттан тахсыбытын быһаарда. Ол түмүгэр оҕо мэйиитин доргуппут, төбөтүн эчэппит. Дьахтар буруйун толору билиннэ уонна кэмсинэрин биллэрдэ.

Судаарыстыбаннай буруйдааччы ирдэбилин ылынан, киин куорат суута дьахтары 1,5 сыл болдьох устата үлэлэтэргэ, ону кытта судаарыстыба дохуотугар хамнаһыттан 5%-нын тутан ыларга уураахтаахта. Суут бириигэбэрэ күүһүгэр киирэ илик.