Дьахтары сүгэнэн өлөрө сатаабыт Дьокуускай олохтооҕо тутулунна

Силиэстийэлиир кэмитиэт Дьокуускай куорат отделениета 40 саастаах Дьокуускай олохтооҕор холуобунай дьыаланы тэрийдэ.

Силиэстийэ быһаарыытынан, муус устар 9 күнүгэр Дьокуускай куорат Пристанская уулуссаҕа турар олорор дьиэҕэ уорбаланааччы итирик туруктаах сылдьан, иирсээн кэмигэр, дьахтары сынньыбыт уонна төбөтүн сүгэнэн охсо сатаабыт. Дьахтар сүгэни уорбаланааччы илиититтэн былдьаабыт уонна быһылаан миэстэтиттэн куоппут.

Билигин дакаастабылы хомуйууга уонна олохтооһуҥҥа силиэстийэлиир уонна процессуальнай тэрээһиннэр ыытыллаллар. Уорбаланааччы тутулунна, диэн Саха сиринээҕи силиэстийэлиир кэмититэтин пресс-сулууспата суруйар.