Дьиикимдэҕэ Абакаяда уобараһынан архитектурнай дьүһүйүү баар буолла
![](https://sakha-sire.ru/wp-content/uploads/2023/10/sajt-7-2-1060x596.jpg)
Ньурба улууһун Дьиикимдэ нэһилиэгэр алтынньы 9 күнүгэр «Утум» Норуот айымньытын дьиэтин тэлгэһитигэр Б.Ойуунускай аатынан Саха тыйаатырын артыыһа, СӨ үтүөлээх артыыһа Маргарита Михайловна Борисоваҕа анаан оҥоһуллубут «Абакаяда» уобараһыттан архитектурнай дьүһүйүү үөрүүлээх аһыллыыта буолла.
Үөрүүлээх тэрээһиҥҥэ Дьокуускай куораттан Маргарита Борисова, улуустааҕы Култуура департамена, Ньурбатааҕы тыйаатыр артыыстара уонна олохтоохтор кыттыыны ыллылар.
Улуустааҕы Култуура департаменын норуот айымньытын сэбиэдиссэйэ, Ньурба улууһунааҕы «Олоҥхо» ассоциациятын салайааччы Розалия Тартакынова улуус баһылыга Алексей Михайлович Иннокентьев илии баттааһыннаах Бочуотунай грамотаны Василий Александрович Чарпыковка туттарда. Ньурбатааҕы көһө сылдьар судаарыстыбаннай тыйаатыр дириэктэрэ Николай Никитин эҕэрдэ тылыгар биир идэлээҕэр Маргарита Михайловнаҕа сибэкки дьөрбөтүн бэлэхтээтэ.
Санатар буоллахха, бу саас кулун тутарга дьиикимдэлэр уруккута «Дьоҕур» Норуот айымньытын дьиэтин «Утум» диэн уларытан туран, Маргарита Михайловна Борисова аатын иҥэрбиттэрэ. «Сата» бэстибээл ыытыллар кэмигэр Маргарита Михайловна оонньообут оруолларыттан «Абакаяда аартыктарынан» Бүлүү бөлөх улуустара кыттыылаах моно-испэктээк күрэҕэ ыытыллыбыта.
Ол саҕана Култуура департаменыгар норуот айымньытын отделын кылаабынай исписэлииһэ Василий Александрович Чарпыков «Абакаяда» архитектурнай уобараһыгар анаан эскиис оҥорбута.
Архитектурнай дьүһүйүү үөрүүлээх аһыллыытын кэнниттэн «Утум» Норуот айымньытын дьиэтигэр СӨ үтүөлээх артыыскатыгар Маргарита Михайловна Борисоваҕа аналлаах тэрээһин буолла. Олохтоохтор ох курдук бэлэмнэнэн, Маргарита Борисова оҕо сааһынааҕы, эдэр эрдэҕинэ оонньообут оруолуттан быһа тардан оонньоон көрдөрдүлэр. Ньурбатааҕы тыйаатыр артыыстара Борис Борисов, Людмила Васильева сыанаттан Маргарита Борисоваҕа анаан эҕэрдэ тыл эттилэр.
Нэһилиэк баһылыга Прокопий Осипов архитектурнай уобарас туох да симиэтэтэ суох, нэһилиэк дьоно-сэргэтэ, дьоҕур уйата дьоһун дьоно дьиикимдэлэр ыра санаа оҥостон, илиилэрин сылааһын иҥэрэн искибиэр оҥорбуттарын бэлиэтээн эттэ. Эбийиэги оҥорууга көмөлөспүт, үлэтигэр кыттыспыт нэһилиэк эр дьонугар: Василий Александровичка, Семён Аввакумовичка, Дьиикимдэтээҕи ОДьКХ салайааччыта Андрей Гаврильевич Антоновка, силиэсэр Иван Федотович Васильевка, сыбаарсык Вадим Сидорович Николаевка, «Арыылаах» ХЭО оператора Михаил Михайловичка махталын биллэрдэ.
Маны сэргэ, Култуура департаменын салайааччытыгар Розалия Михайловна Тихоноваҕа, нэһилиэк кураторыгар Розалия Васильевна Тартакыноваҕа, «Утум» НАДь, оскуола, уһуйаан кэлэктииптэригэр, нэһилиэк дьаһалтатын исписэлиистэригэр, нэһилиэктээҕи дьахтар сэбиэтигэр, олохтоохторго, ыҥырыылаах ыалдьыттарга махтал тылларын анаата.
Нэһилиэк баһылыга Прокопий Николаевич инникитин былааҥҥа АРТ-эбийиэктэр баар буолуохтарын туһунан эттэ.
Маргарита Борисова: «Биир дойдулаахтарбынан киэн туттабын, дьиикимдэлэр наһаа түмсүүлээххитин сөхтүм. Дойдум дьонугар барҕа махтал, эһиэхэ бокулуоммун тиэрдэбин. Саха сиригэр СӨ норуодунай артыыһыгар, РСФСР, САССР үтүөлээх артыыһыгар Ефим Степановка, РСФСР үтүөлээх артыыһыгар, П.А.Ойуунускай аатынан Судаарыстыбаннай бириэмийэ лауреатыгар Степанида Борисоваҕа уонна миэхэ итиник аат иҥэрилиннэ.
Дьиикимдэтээҕи «Утум» Норуот айымньытын дьиэтигэр аатым иҥэриллэн, айар суолум аһыллан, САССР үтүөлээх тренерэ Дмитрий Петрович Коркин 95 сааһыгар анаммыт режиссёр Сергей Потапов сакааһынан испэктээккэ кытынным. Тыйаатыр артыыһа, ырыаһыт, «Сахафильм» режиссёра Валентин Макаров «Мин аатым таптал» киинэтигэр быстах оруолга уһулуннум, кэлэр сыл олунньу 14 күнүгэр көрөөччү дьүүлүгэр тахсыахтаах. Ону сэргэ Лена Эверстова «Харчы. Иэстэбил» киинэтигэр оонньоотум», — диэн кылгастык сэгэтэн билиһиннэрдэ.
Архитектурнай уобараһы оҥорбут Василий Чарпыков: «Дьиикимдэ нэһилиэгин баһылыга Прокопий Осипов, улуустааҕы Култуура департаменын салайааччы Розалия Тихонова идеяларынан Маргарита Борисова «Абакаяда» оруолуттан дүһүйэн оҥорбут эскииспин Маргарита Михайловнаҕа көрдөрөн, сөбүлэҥ ылан, бииргэ үлэлиир Айсен Ивановтуун ылсан, биир ый устата болдьоммут кэмигэр оҥорон бүтэрдибит», — диэн кылгастык билиһиннэрдэ.
Антонина СЕМЕНОВА
![](https://sakha-sire.ru/wp-content/uploads/2023/10/sajt-3-1.jpg)
![](https://sakha-sire.ru/wp-content/uploads/2023/10/sajt-4.jpg)
![](https://sakha-sire.ru/wp-content/uploads/2023/10/sajt-5.jpg)
![](https://sakha-sire.ru/wp-content/uploads/2023/10/sajt-6.jpg)
![](https://sakha-sire.ru/wp-content/uploads/2023/10/sajt-7-3.jpg)
Сообщить об опечатке
Текст, который будет отправлен нашим редакторам: