“Дириҥ оскуолатыгар киинэ көрдүбүт”

Аҕыйах хонуктааҕыта Чурапчы улууһун И.Е.Федосеев-Доосо аатынан Дириҥнээҕи агро-оскуолаҕа бэрт сэргэх тэрээһин буолбут. Ол туһунан Хоптоҕо нэһилиэгин дьаһалтатын баһылыгын солбуйааччы Эдуард Петров бу курдук биһиги саайпытыгар кэпсээтэ:

— Дириҥ оскуолатын киинэ тыйаатырыгар аан бастаан киинэни көрдөрүү буолла. Ол курдук, “Оскуола киинэ тыйаатыра” бырайыак Елена уонна Геннадий Тимченколар “Среда возможностей” аһымал пуондаларыгар кыайыылааҕынан тахсыбыта. Киинэ тыйаатырын сүрэхтэниитигэр Михаил Лукачевскай” Триумф” киинэтин үөрэнээччилэр, учууталлар, дэриэбинэ олохтоохторо астына-дуоһуйа көрдүбүт. Номоххо киирбит биир дойдулаахпыт Павел Пинигин туһунан киинэ барыбытын долгутта, санаабытын өрө көтөхтө. Киинэни көрдөрүөх иннинэ 2 кылаас үөрэнээччитэ Артур Пугачев, 10 кылаас үөрэнээччитэ Николай Захаров уонна оскуола дириэктэрэ Егор Владимирович Адамов кыһыл лиэнтэни үөрүүлээх быһыыга-майгыга  кырыйдылар. Киинэ кэнниттэн үөрэнээччилэр санааларын атастастылар. “Триумф” киинэ көстүүтэ биһиги агро-оскуолабыт олоҕун сэргэхситтэ уонна оҕолору успуорка уһуйууга олус суолталаах буолуоҕа диэн эрэнэбин.

Хаартыска: Любовь Андреева, Сахая Кожурова түһэриилэрэ (Э.Петров ыытта).