Доҕорун массыынатын уоран баран, саахалга түбэспит

Жатай полициятын дьуһуурунай чааһыгар суол саахала буолбутун туһунан иһитинэрии киирбит. «Haval» массыына суоппара тохтоон турар «Toyota Vitz» массыынаҕа тиийэн түспүт. Бу туһунан СӨ ИДьМ пресс-сулууспата иһитиннэрэр.

Уруулга аһыы утаҕы испит 29 саастаах олохтоох киһи олорбута биллибит. Итиригин ааһан, бу киһи массыына ыытар бырааба суох сылдьыбыт.

Быһаарыллыбытынан, уорбаланааччы массыынаны уорбут. Холуобунай ирдэбил үлэһиттэрин дааннайдарынан, быһылаан буолбут күнүгэр кини доҕоругар олорон арыгы испит. Доҕоро утуйбутун туһанан, кини массыынатын уорбут. Айаннаан иһэн сатаан салайбакка, тохтоон турар массыынаҕа тиийэн түспүт. Массыына хаһаайката полицияҕа тута үҥсүбүт.

Холуобунай дьыала тэрилиннэ.