Дьокутааттар нолуок бэлиитикэтигэр, бүддьүөт сокуоннарыгар уларытыылары ылыннылар

Бүгүн Ил Түмэн онус ыҥырыылаах пленарнай мунньаҕа сарсыардаттан тигинэччи үлэлээтэ.

Норуот дьокутааттара бастакы үс боппуруоһу тута көрөн, бүтэһик ааҕыыга ылыннылар.

Бастакы боппуруоһунан «Арассыыйа Федерациятыгар судьуйалар холбоһуктарын уорганнарын туһунан» Федеральнай сокуоҥҥа уонна «Саха Өрөспүүбүлүкэтин судьуйаларын квалификационнай коллегиятыгар уопсастыбаннас бэрэстэбиитэлин туһунан» Саха Өрөспүүбүлүкэтин Сокуонугар сөп түбэһиннэрэн киллэриллибит хандьыдааттары көрдүлэр. Ол курдук СӨ судьуйаларын квалификационнай коллегиятыгар уопсастыбаннастан Татьяна Николаевна Оглезнева уонна Александр Иванович Ошурков кандидатуралара киирдилэр.

Иккис боппуруос «Саха Өрөспүүбүлүкэтин түһээнин бэлиитикэтин туһунан» 2013 сыл сэтинньи 7 күнүнээҕи 1231-C 17-V №-дээх Саха Өрөспүүбүлүкэтин Сокуонугар уларытыылары киллэрэр туһунан икки сокуон барылын иккис ааҕыыга ылыннылар.

Саха Өрөспүүбүлүкэтин Бырабыыталыстыбата киллэрбит «Саха Өрөспүүбүлүкэтигэр бүддьүөт тутулун уонна бүддьүөт хаамыытын туһунан» Саха Өрөспүүбүлүкэтин Сокуонугар уларытыылары киллэрэр туһунан» 174-7 №-дээх Саха Өрөспүүбүлүкэтин сокуонун барылын бүтэһиктээхтик ылылынна.

Бу ыйыллыбыт сокуон барылыгар бэлиэтээһиннэри уонна этиилэри 2024 сыл ахсынньы 12 күнүгэр диэри Саха Өрөспүүбүлүкэтин Ил Түмэнин бүддьүөккэ, үпкэ, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэттэргэ көрбүттэрэ.