Дьокуускай-Аллараа Бэстээх хайысханан түргэн тэтимнээх катердар сылдьыахтара

Бүгүҥҥүттэн, ыам ыйын 24 күнүттэн, Дьокуускай куорат өрүс пуордуттан Аллараа Бэстээххэ диэри түргэн тэтимнээх катердар дьону таһыахтара.

Бастакы күн 16 биригээдэ тахсан үлэлиэҕэ диэн «ЛенаВодСервис» хампаанньа салайааччыта Борис Строев иһитиннэрэр.

«Быстах кэмҥэ айан төлөбүрэ 1000 солк. буолуоҕа, онтон тарыыбы сыыйа-баайа 700 солк. диэри түһэриэхпит. Билигин катердар саппаас чаастара биллэрдик үрдээбитинэн сибээстээн, тарыып сыаната үрдүк. Ол эрээри, тарыыбы урукку таһымҥа тутарга кыһаллабыт», — диэн Борис Строев бэлиэтиир.

Суудуналар киин куорат өрүс пуордун төрдүс причалыттан күн ахсын сарсыарда 7:00 чаастан киэһэ 20:00 чааска диэри айанныахтара. Оттон Аллараа Бэстээхтэн катердар бастакы причалтан сылдьыахтара.