Дьокуускай мас дьиэлэрин үйэтиппит сахалыы куттаах Краснодар худуоһунньуга

Тыйыс килиимэттээх усулуобуйаттан чаҕыйбакка, Саха сирин сөбүлээн, иккис дойду оҥостон олохсуйар дьон үгүс. 

Кинилэртэн биирдэстэрэ — ыраах Краснодартан төрүттээх күтүөт Василий Камшилин.  «Саха сирэ» хаһыат бырааһынньыктааҕы нүөмэригэр “Сатабылга” ыалдьыттыыр Л.А. Ким аатынан Дьокуускайдааҕы Оҕо ускуустубатын оскуолатын уруһуйга учуутала Василий Камшилин.

«Мин 2014 сыллаахха атырдьах ыйын 1 күнүгэр Дьокуускайга үөрэхпин бүтэрэн баран, күтүөттүү кэлбитим. Аан бастаан куоракка киирэн иһэн, эргэ мас дьиэлэри олус сонургуу уонна сөбүлүү көрбүтүм. Ол куораты кытта худуоһунньук хараҕынан билсиитэ этэ. Эргэ мас дьиэ – мин сүрүн тиэмэм. Дойдубар итинник мас дьиэни анаан көрдүүр эбит буоллахпына, манна – хас хардыым аайы. Буолаары буолан, эргэ дьиэни кытта аныгы архитектуралаах дьиэ алтыһыыта – сэдэх көстүү. Ити Саха сирин сөбүлүүрбэр бастакы төрүөт этэ. Иккиһинэн, тымныы кыһын, хойуу туман. Худуоһунньук киһиэхэ ханна да суох ураты сонун тиэмэ. Биһиги диэки кыһыны билбэккин. Биир-икки күн хаар түспүтэ буолан баран, ууллан хаалар. Онон кыһыныҥ бүтэр. Үһүс төрүөт – саха аһа: тоҥ балык, убаһа ойоҕоһо, хаана, быара, буотарах миинэ, саламаат – туохха да бэриллибэт минньигэс амтан. Кэргэним дьоно — чурапчылар. Ол иһин Тааттанан, Чурапчынан аймахтарбытыгар күндүлэнэр аспыт – саха аһа«, — диэн кэпсиир худуоһунньук.

Кэрэхсэбиллээҕэ баар, Москватааҕы В.И. Суриков аатынан судаарыстыбаннай академическай художественнай институт станковай графика отделениетын бүтэрбит айар куттаах худуоһунньук, кырдьык, олох сахалыы тыыннаах киһи. Василий Камшилин билигин көтүрүллүбүт урукку мас дьиэлэри бэйэтин хартыыналарыгар үйэтитэн хаалларбыт улахан үтүөлээх худуоһунньук. Дьокуускай устуоруйата буолан турбут  бу мас дьиэлэри үгүс көлүөнэ дьон өйдүү-саныы сылдьыаҕа. Бу биһиги олохпут сорҕото этэ эбээт! Билигин бу дьиэлэр оннуларыгар — саҥа дьэндэйбит элбэх мэндиэмэннээх таас дьиэлэр тураллар.

Оттон «КПД» дэнэр дьиэлэр — эмиэ Дьокуускай сэбиэскэй кэминээҕи устуоруйата.

Аны айар куттаах худуоһунньук үлэлэрэ хайдахтаах курдук сахалыы тыыннаахтарый!

Тоҥ балыгы олус сөбүлүүр буолан, Василий Камшилин хаһыат үрдүгэр балык арааһын уруһуйдуур.

Биир үтүө сонун — ыам ыйын 15 күнүгэр диэри Василий Камшилин бэрт элбэх үлэтин сиһилии билсиэн баҕалаах дьон Белинскэй уулуссаҕа баар Худуоһунньуктар дьиэлэригэр айар талааннаах дьон үлэлэрин быыстапкатыгар «Арт-Ситим» устуудьуйа-галереяҕа тиийэн билсиэххитин сөп.

Сиһилии В.И. Суриков аатынан судаарыстыбаннай академическай художественнай институту бүтэрбит худуоһунньук Василий Камшилин айар куттаах доҕотторо кинини хайдах саха тылыгар үөрэтэллэрин, үөрэтэр оҕолорун туһунан кэпсиирин «Саха сирэ» хаһыат 1 маайдааҕы нүөмэригэр ааҕыҥ.