Дьокуускай пааркатын тупсарыахтара

Дьокуускайга сынньалаҥ уонна култуура пааркатын сайыннарыыны дьүүллэстилэр.

Дьокуускайга култуура уонна сынньалаҥ пааркатын сайыннарыы экспертнай стратегическай сиэссийэтэ буолан ааста. Куорат дьаһалтата тэрийбит мунньаҕар  КБ Стрелка (Москва) хампаанньа эспиэрдэрэ кытыннылар. Кинилэр саҥардыллыбыт паарка хайдах буолуохтааҕар, куорат олохтоохторо, ыалдьыттара манна тугу көрүөхтэрин баҕаралларыгар, паарканы кыһыннары хайдах үлэлэтиэххэ, тугу гыныахха, уо.д.а. боппуруостарга сыал-сорук туруордулар. Дьүүллэһиигэ архитектура, куорат тутуутун, куорат дьаһалтатын, биисинэс эйгэтин үлэһиттэрэ, куорат көхтөөх олохтоохторо санааларын үллэһиннилэр. КБ Стрелка куораттааҕы антропология киинин салайааччыта Михаил Алексеевскай,  Арассыыйаҕа, Кытайга, Европаҕа үлэлээбит уопуттаах архитектор Анна Ленц, КБ Стрелка сүрүн архитектора Петр Емельянов кыттыыны ыллылар.

Дьокуускай куорат баһылыгын солбуйааччы Антон Алексеенко култуура уонна сынньалаҥ паарката куораты сайыннарыы былаанын биир сүрүн хайысхатынан буоларын бэлиэтээтэ. Дьокуускай паарката дьон-сэргэ таптаан сынньана кэлэр сиринэн буоларыгар тугу оҥоруохтаахтарын дьүүллэһэллэрин, болҕомто онно туһаайылларын эттэ.

Архитектор Анна Ленц паарка куорат олохтоохторо сынньанар бэлиэ миэстэлэринэн буолуохтааҕын ыйда. Кини уопсастыбаннай миэстэлэри тупсарыы аныгы ирдэбилгэ сөп түбэһиэхтээҕин, маныаха хаачыстыбалаах инфраструктура ирдэнэрин, бэлиэ эбийиэктэр наадаларын ыйда. Оттон Михаил Алексеевскай паарка дьон-сэргэ сылы эргиччи тиһиктээхтик сылдьар сирэ буолуохтааҕар тохтоото.  Тыйыс тымныылаах сиргэ бу уустук сорук буолар эрээри, атын куораттарга дьон-сэргэ сынньанар уопсастыбаннай сирдэрин сайыннарыы уопута толкуйу тобулуохха сөптөөҕүн көрдөрөрүн эттэ. Дьүүллэһии иккис күнүгэр уопсастыбаннас бэрэстэбиитэллэрэ кыттыыны ыллылар, санааларын үллэһиннилэр.

Бэлиэтээн эттэххэ, Дьокуускайга култуура уонна сынньалаҥ пааркатын саҥардыы чэрчитинэн «Рекреационнай-сынньалаҥ комплексын тэрийии» бырайыагы олоххо киллэрии былааннанар. Бу дьон-сэргэ манна кыһыннары кэлэн астына, дуоһуйа уонна көхтөөхтүк сынньанарыгар ананар. Маныаха тупсарыы үлэтэ быйылгыттан саҕаланыа диэн иһитиннэрэллэр. Бастакы уочарат киин аллеяны өрөмүөннүөхтэрэ диэн иһитиннэрэр Дьокуускай куорат дьаһалтатын пресс-сулууспата.