Таксыы сыаната төһө буолбутуй?

Ахсынньы ыйыгар Саха сиригэр кыһыҥҥы суоллар аһыллыбыттарын үрдүнэн, улуустар икки ардыларынааҕы таксыы сыанатыгар биллэр-көстөр чэпчэтии тахсыбата.

Эбиитин Саҥа дьылы көрсө дойдуларыгар айанныыр дьоҥҥо-сэргэҕэ сыана өссө үрдүүрэ чинчилээх. Билигин киин куораттан Бүлүү бөлөх улуустарыгар айан сыаната ортотунан 5-7 тыһыынча солкуобай буолар.  Алдан, Нерюнгри диэки, эмиэ итинник хартыына. Суоппардар бэйэлэрэ этэллэринэн, сыана улаханнык уларыйбакка турар. Ону кытта сыана үрдүү турарыгар хас да төрүөт баар. Бастакытынан, Саҥа дьыл бырааһынньыктарын иннинэ дьиэлэригэр төннөр устудьуоннар, үлэһиттэр ахсааннара элбиир. Таксыыга ирдэбил үрдүүр, онон сыана эмиэ үөһэ тахсар. Иккиһинэн, суоппардар уматык сыаната үрдээбитин,  саппаас чаастар ыараабыттарын бэлиэтииллэр.

«Уматык сыаната эбиллэ турар, ону кытта -50 кыраадыс тымныыга массыына алдьаннаҕына өрөмүөнэ икки бүк ороскуоту эрэйэр. Сыанабыт ол ороскуоппутуттан  тахсар», – диэн кэпсиир Дьокуускай-Ньурба хайысхатыгар сылдьар биир чааһынай таксыыс.

Нерюнгри – Дьокуускай — 5 000 солк.
Өлүөхүмэ – Дьокуускай — 12 000 солк.
Ленскэй – Дьокуускай — 13 000–15 000 солк.
Мииринэй — Дьокуускай — 9 000 солк.
Үөһээ Бүлүү — Дьокуускай — 3 500 солк.
Кэбээйи – Дьокуускай — 2 500–3 000 солк.
Чурапчы – Дьокуускай — 2 500 солк.
Амма – Дьокуускай — 2 500 солк.
Покровскай -Дьокуускай 600 солк.
Уус-Ньара- Дьокуускай – 12 000 солк.
Өймөкөөн – Дьокуускай 9 000 солк.
Өлөөн – Дьокуускай 12 000 солк.

Бүгүҥҥү күҥҥэ ити эйгэҕэ сыананы судаарыстыба хонтуруоллаабат, сүрүннээн ирдэбил уонна этии киллэрэр кыахтаах. Диспетчерскэй сулууспалар  үксүгэр суоппардар бэйэлэрэ туруорбут сыаналарын дьоҥҥо тириэрдэр үлэни толороллор. Онон, чугастааҕы кэмҥэ сыана намтыыра күүтүллүбэт. Саҥа дьыллааҕы бырааһынньыктарга айанныыр былааннаах дьон бүддьүөттэрин эрдэтинэ көрүнэллэрэ наада буолла.