Дьокуускай устуоруйатын туһунан быыстапка аһылынна

Ярославскай аатынан кыраайы үөтрэтэр мусуойга «Город Якутск: вехи истории» быыстапка аһылынна. Манна Дьокуускай куорат төрүттэниэҕиттэн ССРС сүтүөр диэри кэм көстөр. Бу Саха АССР 100 сылыгар анаммыт, икки сыллаах быыстапкалыыр бырайыак түмүктүүр тэрээһинэ буолар.

Быыстапкаҕа кэлэн, тугу көрүөххэ сөбүй? Дьокуускай өрөбөлүүссүйэ иннинээҕи уонна сэбиэскэй кэмнээҕи хаартыскаларын, каарталарын, араас малы-салы, таҥаһы-сабы көрүөххэ сөп. Электроннай альбомнары арыйталаан, элбэҕи билиэххит. Куйаар-куодунан «тилиннэрэн», киин куорат кырдьаҕас олохтооҕо Суровецкай, чунуобунньук Щукин, манаах Макарий, суруйааччы Гончаров, кыраайы үөрэтээччи Г.Попов кэпсииллэрин истиэххит.

Быыстапканы арыйыы кэмигэр 1686-1700 сыллардааҕы Дьокуускай кириэппэһин макетын аан бастаан сүрэхтээтилэр. Манна кириэппэс иһигэр ханнык дьиэ, тутуу баара барыта ырылыччы көстөр. Ону тээҥ, мусуой үлэһиттэрэ Дьокуускай куорат устуоруйатын туһунан лиэксийэлэри ааҕар былааннаахтар.

Хаартыска: СИА.