Дьокуускайга 1-12 кылаас үөрэнээччилэрэ уонна эбии үөрэхтээһин тэрилтэлэрэ харантыыҥҥа бардылар

Бу сыл сэтинньи 5 күнүттэн сэтинньи 10 күнүгэр диэри Дьокуускай куоракка 1-12 кылаас үөрэнээччилэрэ уонна эбии үөрэхтээһин тэрилтэлэрэ харантыыҥҥа бараллар. Бу туһунан Дьокуускай куорат дьаһалтатын Үөрэххэ управлениетын салайааччыта Мария Петрова иһитиннэрдэ.

Бу быһаарыы бүгүн, сэтинньи 4 күнүгэр, сытыы ОРВИ ыарыыта тарҕаныытынан сибээстээн, Дьокуускай куораттааҕы санитарнай-эпидемияны утары хамыыһыйа мунньаҕар ылылынна. Төрөппүттэри уонна үөрэнээччилэри сэрэхтээх буолуу миэрэлэрин тутуһарга, доруобуйаларын көрүнэ сылдьарга ыҥырабыт. Ыарыы бастакы бэлиэлэрэ билиннэҕинэ дьиэҕэ олорор уонна бырааска көрдөрөр наадалаах.

«Сэтинньи 5 күнүттэн 10-гар диэри санитарнай-эпидемияны утары хамыыһыйа быһаарыытынан Дьокуускай оскуолаларыгар ОРВИ ыарыыта үрдээбититтэн харантыын биллэрилиннэ. Билигин 83 оҕо балыыһаҕа киирдэ — оҕолор 80-тан тахса бырыһыаннара быһыыны ылбыттарын үрдүнэн. Бу долгутар, дьиксиннэрэр. Төрөппүттэри харантыын миэрэлэрин тутуһарга уонна оҕолору элбэх киһилээх тэрээһиннэргэ, киинэ тыйаатырдарыгар, аралдьытар уонна сынньалаҥ кииннэригэр ыыппаттарыгар ыҥырабын. Официальнай иһитиннэрии Дьокуускай куорат үөрэҕин управлениетын пабликтарыгар тахсыаҕа», — диэтэ Дьокуускай куорат Үөрэххэ управлениетын салайааччыта Мария Петрова.