Дьокуускайга Астана күннэрэ саҕаланнылар

Бүгүҥҥүттэн Дьокуускайга Астана куорат култууратын күннэрэ ыытыллаллар. Бу тэрээһин чэрчитинэн култуура, успуорт, атыы-эргиэн эйгэлэригэр араас тэрээһиннэр уонна официальнай көрсүһүүлэр  буолуохтара.

Ил Дархан Айсен Николаев Астана куорат акиматын  Женис Махмудович  Касымбековы уонна   Арассыыйа  Федерациятыгар Казахстан Өрөспүбүлүкэтин Боломуочуйалаах посола  Даурен Аскербекович Абаевы кытта көрүстэ.

— Саха сирэ  Казахстаны кытта сибээһин  бары салааларга  олохтоон үлэлэһэр, ол иһигэр атыы-эргиэн, экэниэмикэ, култууранай-гуманитарнай бииргэ үлэлэһиҥҥэ.   Казахстан Бэрэсидьиэнэ  Касым-Жомарт  Кемелевич Токаев аатыттан ыалдьыттар  саха төрүт бырааһынньыгын — Ыһыаҕынан Саха сирин олохтоохторугар итии истиҥ эҕэрдэ тылларын тириэртилэр,  — диэн Айсен Николаев телеграм ханаалыгар иһитиннэрдэ.

Инникитин даҕаны бииргэ үлэлииргэ анаан   Астана куорат акиматын икки ардыларыгар  меморандумҥа илии баттастылар.