Дьокуускайга буойун-суруналыыстары кэриэстээтилэр

Ыам ыйын 5 күнүгэр Дьокуускайга Бэчээт дьиэтин таһыгар, буойун-суруналыыстар ааттара көмүс буукубанан суруллубут мемориальнай дуоскаларын  аттыгар кинилэри ахтан-санаан,  кэриэстээтилэр.

Аҕа дойду Улуу сэриитигэр 139 суруналыыс бөрүөнү ыстыыгынан солбуйан, биир бастакынан Ийэ дойдуларын көмүскүү аттаммыттара. Кинилэртэн 18 хорсун буойун кыргыһыы толоонуттан эргиллибэтэҕэ. Бу суруналыыстар истэригэр 1 Сэбиэскэй Сойуус Дьоруойа, 1 Социалистическай Үлэ Дьоруойа, 3 норуодунай суруйааччы, 2 бэрэпиэссэр бааллара. Суруналыыс Феодосий Донской Берлиҥҥэ тиийэн, рейхстаг истиэнэтигэр бэйэтин аатын суруйан хаалларбыта. Ону тэҥэ, суруналыыстар Сэбиэскэй Сойуус Дьоруойа Николай Кондаковынан киэн тутталлар.

Бу күн СӨ Суруналыыстарын сойууһун бэрэссэдээтэлэ Олег Марков, “Сахамедиа” холдинг генеральнай дириэктэрэ Виктор Колесов, СӨ инновацияҕа, цифровой сайдыыга, инфокоммуникационнай технологияларга миниистирин солбуйааччы Георгий Андреев, тыыл бэтэрээннэрэ, сэрии кэмин оҕолоро, бэтэрээн уонна билигин үлэлии сылдьар суруналыыстар, мустубут дьон буойун-суруналыыстары ахтан-санаан, сүгүрүйэн кыһыл гвоздикалары уурдулар.