Дьокуускайга эмиэ теплотрассалары уматан эрэллэр

Дьокуускайга биллибэт дьон эмиэ теплотрассалары уматан эрэллэр. Атырдьах ыйын 10 күнүгэр умаппыттара биллибит.

«Дьокуускайга теплотрассалары уматар буолбуттара быданнаата, Гагаринскай, Промышленнай, Губинскай уокурук олохтоохторо долгуйаллар. Чугас турар дьиэлэргэ кутталынан суоһууллар, аны былааннамматах өрөмүөнү ыытартан сылтаан ууну араарарга күһэллэбит», — диэн «Якутскэнерго» пресс-сулууспата иһитиннэрэр.

Атырдьах ыйын 10 күнүгэр Можайскай уулуссатыгар итии уу ааһар турбатын изоляциятын умаппыттар. Өрөмүөннүүр үлэни ыытаары, энергетиктэр сыалай оройуон уутун араарбыттар. Бу дьиэ аттыгар соторутааҕыта эмиэ турбалары умата сылдьыбыттара. ЯТЭЦ биригээдэтэ турба ситимин барытын уларыппыта.

Умайыы таҕыстаҕына, информацияны быраабы араҥаччылыыр уорганнарга тиэрдэллэр. Дьиэ анныгар киирэр, турба ситимин алдьата сылдьар дьону көрдөххүтүнэ, полицияҕа (02, 102 эбэтэр 112), ЯТЭЦ диспетчерин сулууспатыгар  (21-58-49) эбэтэр салайар хампаанньаҕытыгар биллэриҥ.