Дьокуускайга хабылык уонна хаамыска чөмпүйэнээтэ ыытыллар

Быйылгы чөмпүйэнээт кыттыылаахтара Таатта оройуонун Ытык Күөлүгэр ыытыллар «Манчаары оонньууларыгар» путевка иһин киирсиэхтэрэ. Барыта 80 путевка оонньонуоҕа.

Өрөспүүбүлүкэ сүрүн күрэхтэһиитигэр муниципальнай оройуоннар, ону тэҥэ Дьокуускай куорат хамаандалара кытталлар. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Хамаанданан чөмпүйэнээт олунньу 14-16 күннэригэр «Модун» успуорт комплексыгар Саха сирин физическэй култууратын уонна успуордун үтүөлээх үлэһитэ, чэпчэки атлетикаҕа уонна национальнай атлетикаҕа хас да төгүллээх чөмпүйүөн, национальнай остуол оонньууларын бастакы пропагандиһа Андрей Донскойга ананар.

Бүгүн хабылык оонньуутугар күрэхтэһии сарсыарда 09:00 чаастан «Модун» успуорт уораҕайыгар ыытыллар. Күрэхтэһии үөрүүлээх аһыллыыта бүгүн, олунньу 15 күнүгэр, сарсыарда 10:00 чаастан буолуоҕа.

Олунньу 16 күнүгэр хаамыска оонньуутугар күрэхтэһии сарсыарда 09:00 чаастан саҕаланар. Бу күн күнүс 14:00 чаастан эр дьон уонна дьахталлар ортолоругар абсолютнай күрэхтэһии ыытыллыаҕа.

Санатан эттэххэ, хабылык уонна хаамыска оонньууларыгар Саха сирин чөмпүйэнээтэ 2012 сылтан ыытыллар. 2017 сылтан остуол оонньуулара «Манчаары оонньууларын» бырагырааматыгар киллэриллибиттэрэ.