Дьокуускайга художественнай гимнастикаҕа Уһук Илиҥҥи уокурук бастыҥ гимнастара күрэхтэһэллэр

Бу күннэргэ Саха сирин киин куоратыгар Дьокуускайга аан бастаан художественнай гимнастикаҕа Уһук Илиҥҥи федеральнай уокурукка бастыыр иһин күрэхтэһиилэр буола тураллар.

Бу суолталаах тэрээһин — эрэгийиэҥҥэ успуорт бу көрүҥэ олохтоохтук сайдан, гимнастикаҕа Саха сирин оскуолатын таһыма үрдээбитин билинии. Бүгүн тэрээһин үөрүүлээх арыллыыта буолла. Художественнай гимнастика күрэһэр Уһук Илин 9 эрэгийиэниттэн 28 хамаанда кыттар. 149 гимнаст бөлөҕүнэн уонна биирдиилээн бастыыр иһин күрэстэһиэҕэ.
Саха сирин хамаандатын кылаабынай тириэньэрэ Ксения Дудкина уонна ыстаарсай тириэньэр Виолетта Никифорова салайаллар.

Художественнай гимнастикаҕа Уһук Илин уокуругар аан бастаан ыытыллар бастыыр иһин күрэхтэһиини тэрийээччилэр суруналыыстарга бэлиэтээбиттэринэн, уһулуччу кыахтаах спортсменкалар ураты көрдөрүүлэниэхтэригэр эрэл баар.

Саха сирин художественнай гимнастикаҕа бэрэсидьиэнэ Людмила Николаева бэйэлэрин эрэгийиэннэриттэн бастыҥтан бастыҥнар кэлэн күөн күрэстэһэ сылдьалларын бэлиэтээтэ. «Биһиги тириэньэрдэрбитин кытта сүбэлэһэн баран, РФ гимнастикаҕа федерациятыгар Саха сиригэр дойду таһымнаах спортивнай тэрээһини ыытарга сайаапка түһэрбиппит. Онон сөптөөх хоруйу ылан, бу бэрт улахан суолталаах успуорт бырааһынньыга Саха сиригэр буола турар. Бу күрэхтэһиигэ кыайбыттар муус устарга Санкт-Петербург куоракка ыытыллар художественнай гимнастика чөмпүйэнээтигэр кыттыыны ылыахтара», —  диэн суруналыыстарга эттэ.

Саха сирин гимнастарын кылаабынай тириэньэрэ Ксения Дудкина өрөспүүбүлүкэ икки хамаандата кыттарын иһитиннэрдэ: «Ол курдук, 10 — успуорт маастарыгар хандьыдаат, 10 — бастакы разрядтаах спортсмен өрөспүүбүлүкэ чиэһин көмүскүүллэр».
СӨ успуордун миниистирэ Леонид Спиридонов: «Бүгүн Саха сирин успуордун устуоруйата сурулла турар. Ол курдук, кэлиҥҥи сылларга олох түргэнник уонна бэрт ситиһиилээхтик сайдыбыт успуорт биир бастыҥ көрүҥэр — художественнай гимнастикаҕа бастыыр иһин күрэхтэһии Саха сиригэр ыытылла турара — историческай түгэн», — диэн бэлиэтээтэ.

Онон, доҕоттор, биэс күн устата Дьокуускайга ыытылла турар художественнай гимнастика күрэхтэһиитигэр кэлэн кыттыыны ылыҥ диэн ыҥырабыт.