Тупсаран оҥоруу үлэтэ кыраапык быһыытынан баран иһэр.
Дьон-сэргэ кэтэһэр фонтанын Кытай биригээдэтэ оҥорор. Исписэлиистэр Дьокуускайга эбийиэк туттарыллыар диэри сылдьаллар.
Ил Дархан Айсен Николаев болуоссат Дьокуускай куорат маастар-былаанын олоххо киллэрии иитинэн ыытылларын эрдэ этэн турар. Тупсарыы үлэтэ ыытылларын Арассыыйа Бэрэсидьиэнэ Владимир Путин биһирээбитэ.
«Бигэргэтиллибит маастар-былаан иитинэн, Дьокуускайга Ленин болуоссата, Сайсары күөл тулата, Р.Дмитриев аатынан биэрэк үрдэ тупсарыллаллар. Бу олохтоохторго, ыалдьыттарга аныгы, табыгастаах уопсастыбаннай эйгэ тэриллэр«, — диэн бэлиэтиир Айсен Николаев.
СӨ Ил Дарханыгар архитектураҕа уонна куораты тутууга управлениетын салайар Любовь Папок бэс ыйын саҥатыгар фонтаны оҥоро Кытайтан кэлбит биригээдэ хаһан холбоон үлэлэтиэххэ диэри сылдьарын этэр.
«Дуогабар быһыытынан, тас дойдуттан кэлбит аҕыс киһилээх биригээдэ фонтан холбоммутун кэнниттэн барытын өссө төгүл бэрэбиэркэлиэхтээх, көрүөхтээ-истиэхтээх. Бу тупсарыллан оҥоһуллар сүрүн сири таһынан, өссө түөрт учаастакка үлэ ыытыллар. Аммосов 8 уонна Киров 11 билиитэлэри ууран бүтэрдилэр. Үлэ кыраапыгынан барар«, — диир кини.
«Фонтаҥҥа билиитэлэри уурууга үлэ ыытыллар, тэхиньиичэскэй өттүгэр носуос тэрилин туруораллар. Фонтан уота-күөһэ тэҥҥэ оҥоһуллар«, — диэн сырдатар «Сэттэ» ГК прораба Семен Хон.
Дизайн-бырайыагы «Якутпроект» оҥорбут. Манна үүнээйи арааһа олордуллар, тротуардар саҥардыллаллар, фонтан тупсарыллар, сэргэлэр баар буолаллар. Болуоссат үс учаастакка араарыллар: 2 №-дээх ДП иннинээҕи сирэ-уота, ускуустуба оскуолатын иннинээҕи уонна сынньанар сүрүн сир.
Санатар буоллахха, «Олорор дьиэ уонна куорат эйгэтэ» национальнай бырайыак чэрчитинэн олоххо киллэриллэр «Тупсаҕай куорат эйгэтин тэрийии» федеральнай бырагырааманан, 2024 сылга Саха сиригэр 32 эбийиэк тупсарыллара былааннанар. Ол иһигэр Дьокуускайга Федор Попов искибиэрэ.
СӨ Ил Дарханын уонна Бырабыыталыстыбатын пресс-сулууспата
Никита Федоров хаартыскаҕа түһэриитэ
Сообщить об опечатке
Текст, который будет отправлен нашим редакторам: