Дьокуускайга «Пятерочка»  маҕаһыын ситимин арыйары былаанныыллар

Арассыыйатааҕы розничнай атыы-эргиэн «X5 Group» хампаанньата быйыл 1500 кэриҥэ «Пятерочка» маҕаһыыннары арыйары, ону сэргэ географиятын кэҥэтэри былаанныыр. 

Бу туһунан маҕаһыыннар ситимин генеральнай дириэктэрэ Владислав Курбатов кэмэнтээрий биэрбитин ТАСС суруйар.

«2024 сылга 1,5 тыһыынча саҥа «Пятерочка» маҕаһыыннары аһыахпыт. Өссө хас да атын эрэгийиэннэринэн эбии үлэлэтэр былааннаахпыт. Билигин биһиги маҕаһыыннарбыт дойду 69 эрэгийиэнигэр ситиһиилээхтик үлэлииллэр, сотору кэминэн Читаҕа уонна Дьокуускайга тахсыахпыт дии саныыбын», — диэн Курбатов быһаарда.

Бэлиэтээн эттэхэ,  Уһук Илин уокурукка «Пятерочка» маҕаһыыннар ситимин арыйыы үлэтэ былырыын кулун тутар ыйыттан саҕаламмыта. Ол курдук, Приморскай уонна Хабаровскай кыраайдарга саҥа маҕаһыыннар баар буолбуттара. Ол сыл балаҕан ыйыгар хампаанньа вице-бэрэсидьиэнэ Станислав Богданов Еврейскэй автономнай уонна Амурскай уобаластарга бастакы маҕаһыын ситимин  арыйар былааннаахтарын иһитиннэрбитэ.

Санаттахха, «Пятерочка» федеральнай таһымнаах атыы-эргиэн ситимэ Дьокуускайга аһылларын туһунан сурах киин куорат олохтоохторун өссө былырыын сайын  долгуппута. Нэһилиэнньэ чэпчэки сыаналаах ас-үөл, табаар баар буоларыттан үөрүүлэрэ үрдээбитэ бассаабынан тарҕаммыта, оттон оччотугар урбаанньыттар күүстээх күрэстэһии тахсарыттан айманаллара биллибитэ.

Бу күннэргэ ити боппуруоһу Дьокуускай куораттааҕы Дума мунньаҕар  дьокутааттар дьүүллэстилэр. Маннык ыйытык куораттааҕы мэрия Урбааҥҥа, бырамыысыланнаска, атыыга-эргиэҥҥэ уонна тырааныспарка хамыыһыйатын 2023 сыллааҕы отчуотун кэмигэр көтөҕүллүбүтэ.

Дьокутааттар чэпчэки бородуукталаах «Пятерочка» атыы-эргиэн ситимэ киин куоракка киирдэҕинэ, олохтоох атыы-эргиэн туочукалара ырыынактан тахсар эбэтэр моҥкуруот барар куттала үөскээбитин бэлиэтээбиттэрэ. Аны туран, күрэстэһии тургутуутун ааспатах олохтоох маҕаһыыннар суох буолар түгэннэригэр, бородуукта сыаната хаттаан үрдүүрэ сабаҕалыылларын эттилэр.

«Саха сиригэр федеральнай таһымнаах атыы-эргиэн ситимэ аһыллан, атыылаһааччыга араас чэпчэтиилээх табаар көрүҥэ кэҥиирэ чахчы үчүгэй. Олохтоох атыы-эргиэн туочукалара барыһа суох үлэлээбэттэрэ баар суол.  Мин санаабар, балаһыанньа оннук айылаах кутталы үөскэппэт. Бастатан туран, нэһилиэнньэ олохтоох оҥорон таһаарааччылар экологическай уонна хаачыстыбалаах бородууксуйаларыттан аккаастаныахтара суоҕа. Иккиһинэн, нэһилиэнньэ билиҥҥи тырааныспар логистикатын ирдэбиллэрин уонна уратыларын олус үчүгэйдик билэн олорор. Дьокуускай куорат Думатын дьокутаата уонна Саха сиринээҕи федеральнай антимонопольнай сулууспа управлениетын уопсастыбаннай Сэбиэтин чилиэнэ буоларбынан, федеральнай ситими кытта сөбүлэһии түһэрсиини көҕүлүүргэ этии киллэрэбин.

Докумуоҥҥа хаачыстыбалаах уонна куттала суох аһы-үөлү тарҕатыы бырагырааманан, олохтоох оҥорон таһаарааччылар табаардарын ситим иһинэн эргинэри, үлэ миэстэтин тэрийиини, доруобуйаларынан хааччахтаах дьоҥҥо табыгастаах усулуобуйаны оҥорууну, аһымал бырайыактары олоххо киллэриини хааччыйыы ирдэбиллэрэ учуоттаныахтаах. Уонна саамай сүрүнэ – федеральнай эргиэн ситимэ Саха Өрөспүүбүлүкэтин бүддьүөтүгэр түһээн (нолуок) киллэриэхтээх», — диэн Куораттааҕы Дума дьокутаата Ольга Шерстянникова ТГ-ханаалыгар суруйда.