Дьокуускайга снайпердар турнирдара буолуоҕа

Алтынньы 3-5 күннэригэр Дьокуускайга «Сулус» полигоҥҥа Сэбиэскэй Сойуус Дьоруойа Федор Охлопков аатынан «Бойобуой снайпинг» дьиссипилиинэҕэ сыллата ыытыллар үһүс турнир буолуоҕа. Күрэхтэһии РФ бырабыыталыстыбатын бэрэссэдээтэлин солбуйааччы — Уһук Илиҥҥэ бэрэсидьиэн боломуочуйалаах бэрэстэбиитэлэ Юрий Трутнев салалтатынан ыытыллар. 

— Алтынньы саҥатыгар номнуо үһүс «Бойобуой снайпинг» турнир ыытыллар. Сыл аайы ыытыллар буолан, тэрийээччилэргэ да, кыттааччыларга да улахан эппиэтинэһи сүктэрэр. Турнир биир сүрүн соругунан снайпердар истэригэр уопуту атастаһыы буолар. Арассыыйа аармыйатын бойобуой кыаҕын үрдэтии эмиэ суолталаах. Анал байыаннай дьайыы салҕанар, бойобуой дьайыылар буола тураллар. Онон дойдубутун күүстээх оҥоруохтаахпыт, дьиҥнээх патриоттары иитэн таһаарыахтаахпыт, — диэн Юрий Трутнев эттэ.

Турниры бэрэсидьиэн боломуочуйалаах бэрэстэбиитэлин аппараата, Арассыыйатааҕы бойобуой снайпинг федерацията, «ВОИН» байыаннай-спортивнай бэлэмнээһин уонна патриотическай иитии киинэ, СӨ бырабыыталыстыбата тэрийэллэр.
Манна снайпер пааралар (биир кыттааччыта ытар, биирэ кэтээн көрөр, көннөрөр) күрэхтэһэллэр. Кыттааччылар оруолларын атастаһыа, бинтиэпкэлэрин бэрсиэ суохтаахтар. Спортивнай разрядтан, дуоһунастан, сааһыттан, дьахтар-эр киһи буоларыттан тутулуга суох, бары тэҥ усулуобуйаҕа күрэхтэһэллэр.

Күрэхтэһии күнүскү уонна түүҥҥү кэмҥэ ыытыллыаҕа. Эбии тургутуу баар буолуон сөп. Турнирга булгуччулаах квалификацияны ааспыт эрэ киһи кыттар кыахтаах.

Турнирга кыттарга сайаапканы толорор ирдэнэр. Сайаапканы ok@dfo.gov.ru электроннай буостаҕа ыыталлар. Усунуоһа суох.

Регистрация кэнниттэн, бэрэбиэркэлээн баран, кыттааччылары телеграм-бөлөххө киллэриэхтэрэ.
Билсэр төлөпүөн:  +7-926-860-10-18, электроннай буоста: combatsniper@bk.ru

Сиһилии: https://www.sakha.gov.ru/news/12036