Дьокуускайга суол саахалыгар икки матасыыкыл суоппара эмсэҕэлээтэ

От ыйын 25 күнүгэр түүн Дьокуускай — Хатас хайысхатынан суолга тахсыбыт саахал түмүгэр икки эдэр уол уҥуохтарын тоһутан, балыыһаҕа киирдилэр. Иккиэн суоппардыыр бырааптара уонна харыстанар тэриллэрэ суох сылдьыбыттар.

Дьокуускай куорат Госавтоинспекцията иһитиннэрэринэн, от ыйын 25 күнүгэр түүн 00:17 чааска 22 саастаах «УАЗ-330365» массыына суоппара бырысыаптаах куораттан Хатас диэки айаннаан иһэн, суол бэлиэтин кэһэн, суол быһа охсуһуутугар хаҥас диэки эргийбит. Бу кэмҥэ массыына кэнниттэн биир хайысханан айаннаан испит 18 уонна 20 саастаах икки матасакыыл суоппара эмиэ суол бэлиэтин ирдэбилин кэһэн, утары суолга тахсан ситэн ааһа сатаабыттар. Түмүгэр «УАЗ» массыына бырысыабын кытта харсыспыттар. Саахал түмүгэр икки матасыыкыл суоппара уҥуохтарын тоһутан, балыыһаҕа киллэриллибиттэр.

Докумуоннары бэрэбиэркэлээһин кэмигэр быһаарыллыбытынан, эдэр уолаттар суоппар бырааптара суох эбит. Ону таһынан, саахал буолар кэмигэр харыстанар тэриллэрэ (шлемнэрэ) суох сылдьыбыттар. Бу чахчынан бэрэбиэркэ ыытыллар.