Дьокуускайга вандаллар эмиэ сылаас тохтобулу урусхаллаабыттар

Сэтинньи 16 күнүгэр, өрөбүлгэ, полиция үлэһиттэрэ интэриниэт ситимин кэтээн көрүү кэмигэр Дьокуускай куоракка Дзержинскэй уулуссаҕа баар сылаас оптуобус тохтобул иһинээҕи баай-дуол алдьаммытын туһунан иһитиннэриини булбуттар. Бу чахчынан полиция бэрэбиэркэни ыытар, быһылаан  тахсыбыт төрүөтүн уонна буруйдаахтары быһаарар.

ИДьМ «Дьокуускайдааҕы» салаатын үлэһиттэрэ олохтоохторго туһаайан, сокуоннайа суох дьайыылары уонна буруйу оҥорбуттары булууга көмөлөһүөхтээх ханнык баҕарар иһитиннэриилэри  полицияҕа ыытаргытыгар көрдөһөллөр.

Дьокуускай куорат баһылыга Евгений Григорьев бүгүн, сэтинньи 17 күнүгэр, ыытыллыбыт куорат дьаһалтатын планеркатыгар, муниципальнай сылаас оптуобус тохтобулларыгар баар кэтээн көрөр камералар тиһигин тохтобула суох үлэтин хааччыйарга уонна ИДьМ пультугар тиэрдэргэ сорудахтаата. Бу тиһик полицияҕа тохтобул иһигэр тахсар ыксаллаах түгэннэргэ уонна сокуоҥҥа сөп түбэспэт дьайыыларга түргэнник эппиэттиир кыаҕы биэрэр. Мунньахха бэлиэтэммитинэн, ааспыт субуотаҕа вандаллар урусхаллаабыт сылаас оптуобус тохтобула чааһынай бас билиигэ баар. Атыы-эргиэн эбийиэгэ буолар, онон видеонан кэтээн көрүү тиһигэр холбоммотох. Полиция буруйдаахтары көрдөөһүн салҕанар.

Санатар буоллахха, атын киһи баайыгар-дуолугар буорту оҥоруу иһин буруйдаах РФ үлэлиир сокуоннарыгар сөп түбэһиннэрэн административнай эбэтэр холуобунай эппиэтинэскэ тардыллар.