Дьокуускайга XII «Саха сирин амтана» гастрономическай бэстибээл ыытыллыаҕа

Дьокуускайга сэтинньи 25 күнүттэн 30 күнүгэр диэри кыһыҥҥы биир күүтүүлээх тэрээһин — Дьокуускай куорат уопсастыбаннай аһылык тэрилтэлэрин ортотугар XII «Саха сирин амтана» гастрономическай бэстибээл ыытыллыаҕа. Бу тэрээһин үгэс быһыытынан «Кыһын Саха сириттэн саҕаланар» Бүтүн Арассыыйатааҕы бэстибээл чэрчитинэн буолар.

Куорат бастыҥ  эрэстэрээннэрэ ыалдьыттарга бэйэлэрин фирменнай бүлүүдэлэрин дегустациятын, анал тиэмэлээх менюну, ону таһынан ураты тэрээһиннэри бэлэмниэхтэрэ: авторскай маастар-кылаастары, идэҕэ маастарыстыба күрэхтэрин уонна бырааһынньыктааҕы гала-киэһэ аһылыгы.

Урбаан, эргиэн уонна туризм миниистирин бастакы солбуйааччы Максим Карбушев «Якутия 24» ханаалга «Актуальное интервью» биэриигэ бэлиэтээбитинэн, бэстибээл гастрономическай туризм сайдыытын чаҕылхай бэлиэтинэн буолла.

«Биһиги гастрономическай туризм күүскэ сайдар эрэгийиэннэрин ахсааныгар киирэбит. Биһиги аспыт тымныыны кытта ситимнээх. Биһиги маастардарбыт этэллэринэн: үгүс ас-үөл үрдүк температураҕа буһарыллар буоллаҕына, биһиэнэ – төттөрүтүн, намыһахха. Ол иһин «Саха сирин амтана» бэстибээл «Кыһын Саха сириттэн саҕаланар» тэрээһиҥҥэ олус дьүөрэлэһэр. Быйыл эрэстэрээннэр ахсааннара элбээтэ — тэрийэр кэмитиэт гастросеттэри ахсынньы 15 күнүгэр диэри уһатарга быһаарынна. Күрэх тэрийээччилэрэ — Саха сирин ыалдьытымсах буолуу ассоциацията киирэр хамыыһыйалаах. Кинилэр гастросеттэри амсайаллар, хаачыстыбатын, астаан ууруутун, киэргэтиитин, өҥөлөрүн сыаналыыллар», — диэн кини бэлиэтээтэ.

Быйыл бэстибээл «Арктика кода» диэн тиэмэнэн ыытыллар. Манна ас өбүгэ тыла буолар, оттон ыалдьыттар – былыргы билиини харыстааччылар.

• Бастакы күн, сэтинньи 25 күнүгэр, гастрономическай киэһээҥҥи аһылыктар «Asai» уонна «Kitchen» эрэстэрээннэргэ, оттон «Муус Хайа» комплекска «Өбүгэ аһа» авторскай маастар-кылаас ыытыллыаҕа.
• Сэтинньи 26 күнүгэр ыалдьыттары «Муус Хайаҕа» киэһээҥҥи аһылыктар, ону таһынан «Хомус амтана: Дорҕоон. Былыр. Гастрономия» диэн культурнай-гастрономическай киэһэ күүтэр.
• Сэтинньи 27 күнүгэр бэйэлэрин күрэхтэһэр сеттэрин «РекаОзероЛес», «Chuckcha», «Тортуга» уонна «Крыша» эрэстэрээннэр көрдөрүөхтэрэ.
• Сэтинньи 28 күнүгэр бүлүүдэлэрин «Дойдум аһа» уонна «Кивис» эрэстэрээннэр көрдөрүөхтэрэ.
• Эрэстэрээннэр бырагыраамалара сэтинньи 29 күнүгэр «Naraada Village» парк-отельга, «Тыгын Дархан» уонна «Махтал» эрэстэрээннэргэ киэһээҥҥи аһылыктарынан түмүктэниэ.