Дьокуускайга «Үтүө санаа харыйата» аһымал аахсыйа саҕаланна

Өрөспүүбүлүкэ киин куоратыгар «Үтүө санаа харыйата» аахсыйа саҕаланна. Быйыл  үтүө үгэскэ кубулуйбут аһымал тэрээһин 10 сылын туолар. Аахсыйа ахсынньы 4 күнүттэн 26-гар диэри ыытыллыаҕа.

Бу аахсыйаны 2015 сыллаахха Дьокуускай куорат баһылыгынан үлэлиир кэмигэр Саха сирин Ил Дархана Айсен Николаев саҕалаабыта. Үгэс быһыытынан, аахсыйаҕа кыттааччылар оҕо аата суруллубут  аһаҕас суругу талан ылан, киниэхэ анаан бырааһынньыктааҕы бэлэҕи атыылаһыахтарын сөп. Тэрээһини ыытар «Эдэр ыччат лиигэтэ» ААУо бэлиэтииринэн, бу көҕүлээһиҥҥэ дьон интэриэһэ сылтан сыл аайы намтаабат. Тэрийээччилэр этэллэринэн, 2025 сыллаахха Саха сирин олохтоохторун кыттыытын түмүгэр, өрөспүүбүлүкэ социальнай тэрилтэлэригэр иитиллэр икки тыһыынчаттан тахса оҕоҕо бэлэх туттарыллыаҕа.

«Биһиги аахсыйаны бары баҕалаах киһи кыттар кыахтаах буоларын курдук оҥорорго дьулуһабыт. Хас биирдии аһаҕас сурукка оҕо туох баҕарара чопчу ыйыллар, бэлэх хайаан да тус бэйэтигэр тиэрдиллэр», — диэн «Эдэр ыччат лиигэтэ» тэрилтэҕэ  бэлиэтээтилэр.

«Үтүө санаа харыйата» куорат хас да сиригэр туруорулунна. Аһаҕас суруктары «Бубль-Гум» маҕаһыын икки салаатыттан — Кальвица уул., 14/5 уонна Дзержинскэй уул., 71 аадырыстарыттан, ону тэҥэ «Өлүөнэ очуостара» универмагтан (ЦУМ, 2-с этээс) талан ылыахха сөп. Кыттааччы аһаҕас суругу ылан, бэлэх бэлэмнээтэҕинэ сөп буолар, атын эбии ирдэбил суох. Бэлэхтэр Саҥа дьыл иннинэ оҕолорго тиэрдиллиэхтэрэ. Тэрийээччилэр бэлиэтииллэринэн, аахсыйа уон сыл иһигэр өрөспүүбүлүкэ олохтоохторун тус көмө оҥоруу тула түмэр суолталаах социальнай көҕүлээһиҥҥэ кубулуйда.

«Үтүө санаа харыйата» ахсынньы 26 күнүн киллэрэн туран үлэлиэҕэ.