Доллуга аҕыс кыбартыыралаах саҥа дьиэ үлэҕэ киирдэ

Бүгүн Мэҥэ Хаҥалас улууһун  Доллу нэһилиэгэр дойду бэрэсидьиэнэ  Владимир Путин көҕүлээбит  «Хаарбах дьиэттэн дьону көһөрүү» бырагырааманан саҥа таас дьиэ үөрүүлээх быһыыга-майгыга  үлэҕэ киллэрилиннэ. 

Саҥа кыбартыыра күлүүһүн туппут ыаллара  үөрүүлэрэ үгүс. Эбийиэги Владислав Ефремов салайааччылаах «Фаворит» ХЭТ аныгы ирдэбилгэ толору эппиэттиир гына туппут. Икки этээстээх, аҕыс кыбартыыралаах, толору хааччыллыылаах таас дьиэҕэ аҕыс ыал көһөн киириэхтэрэ.

Бу олус наадалаах бырагыраама үлэлээн, үгүс киһи сыллата саҥа кыбартыыранан хааччыллар. «Дьон-сэргэ олоҕо тупсарыгар улахан болҕомто уурулларыгар дойдубут лиидэригэр Владимир Путиҥҥа, Ил Дархан Айсен Николаевка, Тутуу министиэристибэтигэр,   дьиэни туппут дьоммутугар махтанабыт!», — диэн Мэҥэ Хаҥалас улууһун дьаһалтатын пресс-сулууспата иһитиннэрдэ.