Дьоруой аатын иҥэрэргэ 48 тыһыынчаттан тахса илии баттааһын хомулунна

Саха хорсун разведчига Василий Даниловка Арассыыйа Дьоруойун үрдүк  аатын иҥэрэр туһунан туруорсууну өйөөн, 48 тыһыынча 538 илии баттааһын хомулунна. Онно олоҕуран көрдөһүү суруктар дойду Аҕа баһылыга  Владимир Путиҥҥа, оборуона миниистирэ Сергей Шойгуга  уонна  Ил Дархан Айсен Николаевка  ыытылыннылар.

Маны таһынан, уопсастыбаннас  саха саллаатын хорсун быһыытын үрдүктүк бэлиэтиир туһунан ыҥырыыта  Федерация Сэбиэтин  чилиэннэригэр,  Госдуума депутаттарыгар  туһаайылынна.

Санатан эттэххэ, илии баттааһыны Василий Данилов биир дойдулаахтара — уус алданнар көҕүлээһиннэринэн саҕаламмыта. Уопсастыбаннай аахсыйаны  Дьокуускай көхтөөх дьоно  күүскэ өйөөтүлэр.

Норуот көҕүлээһинин  байыаннай дьайыы кыттыылаахтара, кинилэр дьиэ кэргэттэрэ, госпиталга эмтэнэ сытар саллааттар өйөөтүлэр. Хабаровскайга Василийдыын бииргэ сулууспалаабыт байыаннайдар, Москваҕа, Санкт-Петербурга олорор сахалар кыттыстылар.

Саха сирин устуоруйатыгар маннык элбэх илии баттааһыны, ол эбэтэр  48 тыһыынчаттан тахса илии баттааһыны  ким даҕаны хомуйа илик.