Дьурустаан: «Инникитин устуоруйаны сэҥээрээччилэр туһаныахтара…»

Тохсунньу 9 күнүгэр Уус Алдан улууһугар Мүрүгэ «Түһүлгэ» киин балаҕан-дьиэтигэр Саха Өрөспүүбүлүкэтин Суруйааччыларын сойууһун чилиэнэ, публицист, тылбаасчыт, С.А.Новгородов аатынан «Айар» национальнай кыһа генеральнай дириэктэрин солбуйааччы, СӨ култууратын үтүөлээх үлэһитэ Валерий Николаевич Луковцевы-Дьурустааны кытары көрсүһүү истиҥ быһыыга-майгыга буолан ааста.

Маннык тэрээһиҥҥэ сүрүннээн уран тылы сэргээччилэр, ааптар талааныгар сүгүрүйээччилэр, айар үлэни сэҥээрээччилэр сылдьаллар. Ол да курдук, бу көрсүһүүгэ «Уһуктуу» литературнай, «Кэскил түһэ» ийэ тыл уонна «Умсулҕан» кэллиэксийэньиэрдэр түмсүүлэрэ көхтөөх кыттыыны ыллылар. Валерий Николаевич айар үлэтин кэрэһиттэрэ буолар кинигэлэрин туһунан киһи төһө баҕарар истэ олоруох курдук интэриэһинэйдик, хомоҕойдук билиһиннэрдэ.

«Мин тоҕо маннык суруйаҕын диир буоллахха, инникитин салайар үлэлээхтэргэ, устуоруйаны сэҥээрээччилэргэ туһалаах буолуо дуу диэн санаанан салайтарабын», — диэн эппитэ кини дириҥ толкуйдааҕын, ырааҕы көрөр дьоҕурдааҕын туоһулуур. Валерий Николаевич сахалыы тылынан суруллар айымньы ааҕааччыга тиийиитигэр, соҕотох национальнай кыһабыт сайдыытыгар оҥоро сылдьар үлэтэ, туһата, үтүөтэ-өҥөтө тугунан да кэмнэммэт бөдөҥ буоллаҕа.

Мин «Сарбыллыбыт таптал» диэн казах биллиилээх суруйааччыта Алибек Аскаров кинигэтин сонурҕаатым. Бу муммут дьылҕалаах көлүөнэ туһунан биир сэһэн уонна үс кэпсээн киирбит кинигэ нууччалыыттан сахалыы тылбааһын Дьурустаан оҥорбут. Баар дьон оччотооҕу казах ыччатын туһунан бэйэбит тылбытынан үөрэ-көтө ааҕар, билсэр санаалаах былдьаһа-тарыһа ыллыбыт, ааптарга илии баттаттыбыт. Салгыы ааптар мустубут дьон ыйытыыларыгар хоруйдаата, айар үлэ, билиҥҥи олох туһунан санаатын үллэһиннэ. Киэҥ хабааннаах кэпсэтиигэ барыбытын долгутар ийэ тылбыт дьылҕатын туһунан ырытыһыы эмиэ буолла. Манна Чурапчыттан «Сахам сайдам саҥата» бөлөх салайааччыта Лариса Игнатьевна Барашкова-Күн Чөмчүүк кыттыыны ылбыта көрсүһүү ис хоһоонун ураты тыыннаабытын бэлиэтиир тоҕоостоох. Тэрээһин кыттыылаахтара Валерий Николаевичка айар үлэтигэр саҥа кинигэлэри, салайар үлэтигэр ситиһиини, тус бэйэтигэр чэгиэн туругу, дьиэ-кэргэнигэр этэҥҥэ буолууну, дьолу-соргуну баҕара хааллыбыт.

Светлана БУРЦЕВА, уопсастыбаннай кэрэспэдьиэн