Дыгын оонньуулара: Уус Алдан улууһугар чөмпүйүөн Куубага ыытыллыаҕа

Уус Алдан улууһа национальнай многоборьеҕа чөмпүйүөн Куубагын ыытарга бэлэмнэнэр.

Күрэхтэһии Дыгын оонньууларыгар иккис сүүмэрдиир түһүмэҕэ буолуоҕа. Оонньууга чөмпүйүөннэр Леонид Филиппов, Алексей Уваровскай уонна Вячеслав Дьяконов кытталлара күүтүллэр.

«Чөмпүйүөн Куубагын олунньу 1-2 күннэригэр Бороҕон сэлиэнньэтигэр Николай Тарскай аатынан успуорт уораҕайыгар ыытары былаанныыбыт. Манна Дьокуускайга ыытыллыбыт бастакы сүүмэрдиир турнирга кыттыбатах спортсменнар бары кыттыахтарын сөп. Күрэхтэһии түмүгүнэн кыттааччылар Дыгын оонньууларыгар кыттарга рейтининэн бааллары хомуйуохтара», — диэн Национальнай многоборьеҕа Федерациятын толорооччу дириэктэрэ Иван Белолюбскай иһитиннэрдэ. Кыттааччылар ортолоругар Дыгын оонньууларын кыайыылаахтара Леонид Филиппов, Алексей Уваровскай, Вячеслав Дьяконов, национальнай многоборье сулустара Николай Матаннанов, Айсен Ботуев, Артем Дьяконов, Борис Сдвижков, Яков Дмитриев, Владимир Шологонов, Павел Друзьянов, Алексей Созонов, Айсен Семенов уо.д.а кыттыахтара.

Санатан эттэххэ, бастакы сүүмэрдиир турнирга 56 спортсмен кыттааччылаах ахсаанынан саҥа рекорд олохтоммута. Ол сүүмэрдиир турнир кыайыылааҕынан Таатта улууһуттан Николай Матаннанов таҕыспыта (50 баал). Иккис — Артем Дьяконов (48 баал), үһүс — Үөһээ Бүлүүттэн Владимир Шологонов (46 баал), төрдүс — Кэбээйиттэн Яков Дмитриев (44 баал), бэһис — Тимофей Большаков (43 баал). Очкону 47-с миэстэҕэ диэри бары спортсменнар ылбыттара. Үс сүүмэрдиир түһүмэх түмүгүнэн 15 бастыҥ спортсмен Дыгын оонньууларыгар киирсиэхтэрэ. Билиҥҥи чөмпүйүөн Дьулустаан Ноговицын балаһыанньаҕа сөп түбэһиннэрэн Дыгын оонньууларыгар путевкаҕа тиксибитэ биллэр. Спортсменнар успуорт көрүҥүнэн национальнай ыстаҥаҕа, тутум эргииргэ, мас тардыһыыга, оҕунан ытыыга, сүүрүүгэ, хапсаҕайга уонна таас көтөҕүүгэ киирсиэхтэрэ. Куубак кыайыылаахтара уонна призердара сыаналаах бириистэринэн наҕараадаланыахтара.