Дьыктаан суруйдулар, остуол оонньууларыгар күрэхтэстилэр

Уус Алдаҥҥа С.Васильев -Борогонскай аатынан киин бибилэтиэкэ ааҕар саалатыгар үгэскэ кубулуйбут «Олоҥхо дьыктаана» аахсыйа ыытылынна.

Аахсыйа сыала сахалыы таба суруйуу үөрүйэҕин сайыннарыы уонна олоҥхо баай тылынан-өһүнэн билиини-көрүүнү кэҥэтии буолар.

Быйыл араас эйгэҕэ үлэлиир улууспут 23 олохтооҕо кэлэн кыттыыны ылла. Кинилэр И.И.Бурнашев -Тоҥ Суорун «Сылгы уола Дыырай бухатыыр» олоҥхоттон «Сир Ийэ дойду айыллыыта» түһүмэхтэн быһа тардыыны суруйдулар. Быйылгы дьыктаан тиэкиһигэр олоҥхоһут бэйэтэ хайдах толорон саҥарбытынан киирбит тыллар бааллара уратылаах буолла.

Кыттааччылар суруллубут үлэлэрэ бэрэбиэркэлэнэр, түмүк тахсарын кэтэһэр кэмнэригэр «Олоҥхо биһигэ — Уус Алдан» быыстапка туһунан «Алгыс» кыраайы үөрэтэр салаа сэбиэдиссэйэ Ольга Николаевна Павлова бэсиэдэтин иһиттилэр. Салгыы саха тылын сайыннарар араас остуол оонньуутугар күрэхтэһэн сэргэхсийэн ыллылар.

Түмүккэ «Бастыҥтан бастыҥ суруйааччы» аатын Елизавета Алексеевна Дьячковская, бастыҥ суруйааччылар Елизавета Николаевна Данилова, Сардана Романовна Бочкарева буоллулар.

Татьяна Бурцева

Хаартыскалар ааптар тиксэриилэрэ

Хаартыскалар Т.Бурцева тиксэриилэрэ