Өбүгэ оонньуутун өрө тутан

Амматааҕы О.П.Иванова-Сидоркевич аатынан айар сайдыы киин эбии үөрэхтээһиҥҥэ педагога  Валентина Васильевна Иванова өбүгэ төрүт оонньуутун сөргүтүүнэн, тарҕатыынан, кэнчээри ыччаты уһуйуунан утумнаахтык дьарыктанар.

Бу күннэргэ бэртээхэй күрэхтэһии ыытыллыбыт. Уопсайа түөрт уонтан тахса оҕо кэлэн кыттыыны ылбыт. Эбии үөрэхтээһин педагога В.В.Иванова бу курдук кэпсиир:

—Үөрэнээччини эт-хаан, өй-санаа өртүнэн сайдарыгар, оҕо толкуйдуу үөрэнэригэр болҕомтобун уурабын. Төрүт оонньуу көмөтүнэн оҕо дьоҕурун, талаанын арыйаргы, үөрэнээччи тулуурдаах, дьулуурдаах буоларыгар кыһаллабын, сыалы-соругу онно туруорабын. Бу курдук сахалыы остуол оонньууларыгар такайбытым-үөрэппитим тохсус сыла буолла.

Аҕыйах хонуктааҕыта Амматааҕы О.П.Иванова-Сидоркевич аатынан айар сайдыы киинин тэрийиитинэн улууска хабылыкка уонна хаамыскаҕа күрэхтэһии бэртээхэйэ буолла. Күөн күрэскэ Л.В.Киренскэй аатынан Амматааҕы лиссиэй, В.В.Расторгуев аатынан 2 нүөмэрдээх орто оскуола, Амматааҕы В.Г.Короленко аатынан 1 нүөмэрдээх орто оскуола уонна Амматааҕы айар сайдыы киинин иһинэн үлэлиир куруһуок оҕолоро ох курдук оҥостон кэлэннэр илин-кэлин түһүстүлэр. Тэрээһин олус сэргэхтик барда. Барыта 41 оҕо кытынна. Саастарынан, кылаастарынан арахсан кииристилэр. Кыайбыт оҕолор 1,2,3 миэстэлэргэ тигистилэр уонна мэтээллэринэн наҕараадаланнылар. Оҕолор, төрөппүттэр, учууталлар бары маннык күрэхтэһии кэмиттэн-кэмигэр ыытылла турарыгар баҕардылар.

Валентина Иванова,

Амма.

Ааптар хаартыскаҕа түһэриитэ.