Өймөкөөн Чысхааныттан сэртипикээт ылаары туристар мусталлар

Бу күннэргэ Тымныы полюһунан аатырар Өймөкөөн нэһилиэгэр туристар үгэс быһыытынан тоҕуоруһа мусталлар.

Тымныы хаһаайынын — Өймөкөөн Чысхаанын брендигэр үлэлэһэр улуустааҕы култуура уонна туризм сайдыытын управлениетын методиһа, хаартыскаҕа түһэриинэн дьарыктанар көхтөөх уопсастыбанньык, олохтоох мелодист, мас уонна тимир ууһа Семен Сивцев-Өймөкөөн Сэмэнигэр Саҥа дьыл бырааһынньыга — үлэтин саамай үгэнэ.

— Быйыл туристар кэлиилэрэ тохсунньуттан буолбакка, ааспыт сыл алтынньытыттан саҕаламмыта. Ол эбэтэр сурукка киирбитинэн сыл саҕаланыытыгар 101 турист Тымныы полюһугар сылдьыбытын туһунан сэртипикээти ылбыт буоллаҕына, былырыыҥҥыны кытта аахтахха, 168 киһи араас дойдуттан кэлэн барда. Ол курдук, Малазияттан, АХШ-тан, Японияттан, Австралияттан, Кытайтан, Донбастан, Москваттан, Подмосковьеттан, Санкт-Петербургтан,  Белоруссияттан кэлэ сырыттылар. Сүрүннээн Арассыыйа киин куораттарыттан туристара кэлэллэр.

Саамай элбэх турист Москваттан кэллэ. Кинилэри көрсөрүм быыһыгар дойду киин куоратыгар тиийэн, Леонид Якубович ыытар “Поле чудес” биэриитигэр уһулла охсон кэлбитим. Онтон кэлэн, салгыы дьоммор сэртипикээттэрин туттара сылдьабын. Ол докумуона суох сатамматтар. Чысхаантан сэртипикээт ылаары анаан оҥостон кэлэллэр. Бэйэм хаартыскаларбын көрдөрөр Балаҕан-галерея тутан үлэҕэ киллэрбитим. Таба тайаммыппын — турист олус кэрэхсиир. 

Бүгүн түөрт турист — Киров куораттан, биир киһи — Кытай Пекин куоратыттан баар буола түстүлэр. Өйүмүгэ москвичтар анаан сөтүөлээн бардылар. Кулууптар ыытар фольклорнай кэнсиэрдэрин олус сэргииллэр, саха оонньууларыгар ордук тартаран оонньууллар.

Дьэ, туристарбыт үгүстэрэ бэркэ кыанар дьон эбит – «Ойбонтон уулааһыны», хаамысканы тулуппаттар.

Үлэ күннэрин саҕаланыыта Өймөкөөҥҥө турист кэлиитэ тохтуоҕа. Уһун өрөбүл күннэригэр анаан былааннанан кэлэр буолбуттара үгэскэ кубулуйда. Онон олохтоохтор сынньаныахтааҕар, бу күннэргэ кыралыын-улаханныын үлэбит үгэнэ.  Аны тохсунньу ортотуттан сүүрүү марафонугар элбэх киһи кэлэрин күүтэбит, — диэн санаатын үллэһиннэ Өймөкөөн Сэмэнэ.