Өймөкөөн Томторугар Ан-3 сөмөлүөтү уруйдуу көрүстүлэр

Муус устар ортотуттан «Полярные авиалинии» Ан-2 уонна Ан-3 сөмөлүөттэринэн өрүс уҥуор улуустарга – Кэбээйигэ, Томпоҕо, Уус Маайаҕа уонна Өймөкөөҥҥө көтүүнү саҕалаата.

– Кэмиэрчэскэй сулууспа муниципальнай тэриллиилэр дьаһалталарын кытта ыкса үлэлэһэн, айанньыттарга табыгастаах кыраапыгы оҥордулар. Үгэс быһыытынан көтүүлэри Маҕан аэропордуттан оҥоруохтара. Айанньыттар көтүү кыраапыгар уочаракка  эрдэттэн суруттараллар.  Томторго (Өймөкөөҥҥө) сөмөлүөт  муус устар 24,  ыам ыйын 8 уонна 15 күннэригэр көтүөҕэ. Аара көтөн иһэн сөмөлүөт Теплай Ключка (Хандыгаҕа) тохтуоҕа, — «Полярнай авиалинии» АУо пресс-сулууспата иһитиннэрэр.

Быйыл кулун тутарга Өймөкөөн улууһун баһылыга Александр Оконешников «Полярные авиалинии» генеральнай дириэктэрэ Семён Винокуровы кытта анаан көрсөн, суол алдьанар кэмигэр пассажирдары салгын аалынан тиэйиини тэрийии боппуруоһун дьүүллэспитэ.  «Чехословацкай» дэнэр самолеттар өрөмүөҥҥэ туралларынан сибээстээн,  Ан-3 сөмөлүөт көтөрө быһаарыллыбыта. Онон бу оробуочай көрсүһүү түмүгэ нэһилиэк олохтоохторугар бэлиэ түгэни тосхойдо –  Өймөкөөн улууһун Томторугар Ан-3 бастакы көтүүтүн оҥордо. Олохтоохтор өр сылларга «сүтэ сылдьыбыт»  көтөр аалы уруйдуу-айхаллыы көрүстүлэр. Социальнай ситимнэргэ баһылыктарыгар үгүс махтал тыла этилиннэ. Аны салгынынан иккис  сырыы ыам ыйын 8 күнүгэр оҥоһулларын олохтоохтор эрэнэ кэтэһэллэр.