Өймөкөөҥҥө хоромньуну ааҕар хамыыһыйа үлэлиэҕэ

Бүгүн, от ыйын 17 күнүгэр, Өймөкөөн оройуонугар СӨ бырабыыталыстыбатын оробуочай бөлөҕө уонна хоромньуну сыаналыыр исписэлиистэр көтөн тиийиэхтэрэ.

— Бүгүн  исписэлиистэр тиийэн,  хоромньуну сыаналыырга үлэлиэхтэрэ. Бу иннинэ ууга барбыт сиргэ быыһааччылардаах үс сөмөлүөт ыытыллыбыта – кинилэр олохтоохторго көмөнү оҥороллор. Быстах кэмҥэ олорор  тоҕус пуун аһылынна: Өймөкөөн оройуонугар сэттэ уонна Абый улууһугар икки.  Ил Дархан  Айсен Николаевка суһал иһитиннэриилэр киирэн иһэллэр, кини балаһыанньаны хонтуруолга тутар, — диэтэ өрөспүүбүлүкэ бырабыыталыстыбатын бэрэссэдээтэлин бастакы солбуйааччы Дмитрий Садовников.

Индигиир өрүскэ уу таһыма 2-10 см диэри түстэ. Өймөкөөн нэһилиэгэр, сарсыарда  8 чаастааҕы туругунан, уу таһыма 578 см тэҥнэһэр, ааспыт 4 чаас иһигэр 2 см түспүт. Аллараа өттүгэр, Юрта гидропост аттыгар уу таһыма 887 см (4 чаас иһигэр 23 см үрдээбит, кутталлаах таһыма 1089 см). Уус-Ньара бөһүөлэгэр уу таһыма 535 см, 4 чаас иһигэр 9 см түһэн турар. Хонуу сэлиэнньэтигэр уу таһыма 637 см, 10 см түстэ. Ньара үрэххэ Ала-Чубук гидропоска 635 см (9 см түспүт).

Уопсайа Өймөкөөн оройуонугар биэс нэһилиэнньэлээх пууҥҥа 347 тиэргэн, 93 олорор дьиэ уонна биир социальнай суолталаах эбийиэк (оскуола) ууга барда.

Ууга барбыт нэһилиэнньэлээх пууннартан 110 киһи, ол иһигэр 39 оҕо көһөрүлүннэ. Уус-Ньараҕа 19 киһи (1 оҕо) көһөрүлүннэ, барыларын аймахтарыгар түһэрдилэр. Өймөкөөҥҥө 70 киһи (30 оҕо) көһөрүлүннэ, онтон 33 киһини (16 оҕо) быстах кэмҥэ олорор кииҥҥэ киллэрдилэр. Томтор нэһилиэгэр 21 киһи эвакуацияламмыт, ол иһигэр 8 оҕо, ону эмиэ аймахтарыгар олордубуттар.

Өймөкөөн оройуонугар суол икки учаастага ууга барда: «Өймөкөөн» эрэгийиэннээҕи суол уонна «Колыма» федеральнай трасса. Уу таһыма бүтүннүү түспүтүн кэннэ чөлүгэр түһэрии үлэтэ саҕаланыаҕа.

Өймөкөөн улууһугар ЫБММ кылабынай управлениетын суһал  быыһыыр этэрээтэ уонна СӨ Быыһыыр сулууспатын быыһааччылара үлэлииллэр.

Маны тэҥэ, Муома улууһугар уонна Абый улууһун Кэбэргэнэ бөһүөлэгэр тиэргэннэр ууга барбыттара бэлиэтэнэр.

Сиһилии: https://www.sakha.gov.ru/news/8424