Екатеринбург устудьуоннара байыастарга көмөлөһөллөр

Бу күннэргэ «Саха волонтердара» хамсааһын колл-киинигэр Екатеринбург куораттан госпиталга сытар байыастан сайаапка киирбит.

Саха сириттэн сылдьар байыас волонтердар көмөлөрүгэр наадыйарын туһунан иһитиннэрбит.

В. Ф. Яковлев аатынан Ураллааҕы судаарыстыбаннай юридическай университет устудьуоннара, «Түмсүү» устудьуоннар түмсүүлэрин көхтөөх ыччаттара тута сөбүлэһэн 354-с байыаннай-клиническэй госпиталга Василийга тиийэ сырыттылар. Устудьуоннар байыаска наадалаах малын илдьэн биэрдилэр.

«Саха волонтердара» хамсааһын дьон кыһалҕатын өйдүүр, үтүө санаалаах устудьуоннарга Николай Атласовка, Виолетта Семеноваҕа, Алексей Федоровка уонна Судаарыстыбаннай уонна норуоттар икки ардыларынааҕы быраап институтун дириэктэрин солбуйааччы Максим Матвеевка тус бэйэтигэр махталларын тиэрдэллэр.

Оттон байыас устудьуоннарга махталын ыытар: «Улахан Махтал! Наһаа маладьыастар. Дьиҥнээх өйөбүл, көмө диэн бу буоллаҕа!».